MSK: Saat 17:00-a olan məlumata görə, referendumda seçicilərin iştirakı 63,6%-ə çatıb (YENİLƏNİB)

Bakı/26.09.16/Turan  Saat 17:00-a olan məlumata görə, Konstitusiyaya dəyişikliklərlə bağlı referendumda 3 mln. 348 min 535 seçici səs verib. Beləliklə, MSK İnformasiya Mərkəzinin rəhbəri Fərid Orucovun məlumatına görə, seçicilərin iştirakı 63,6% təşkil edib. –06D-

2016 Sentyabr 26 (Bazar ertəsi) 16:06:44

Bakı/26.09.16/Turan:  MSK-nın saat 15:00-a olan məlumatına görə, Azərbaycan Konstitusiyasına dəyişikliklərlə bağlı referendumda seçicilərin yarıdan çoxu səs verib.

MSK katibliyi İnformasiya Mərkəzinin rəhbəri Fərid Orucov mətbuat konfransında bildirib ki, saat 15:00-a kimi 5 267 111 seçicidən 2 833 064-u səs verib.

Beləliklə, seçkidə iştirak 53,8% təşkil edib.—06D--

2016 Sentyabr 26 (Bazar ertəsi) 13:24:24

Bakı/26.09.16/Turan: Azərbaycan MSK-nın məlumatına görə, saat 12.00-a referendumda seçicilərin 30,6%-i – 1613 879 nəfər səs verib. -02D-

2016 Sentyabr 26 (Bazar ertəsi) 11:44:16

Bakı/26.09.16/Turan: MSK-nın məlumatına görə, saat 10:00-a qədər Azərbaycan Konstitusiyasına düzəlişlər üzrə referendumda 680 438 seçici və ya seçicilərin ümumi sayının – 5 mln. 287 min 111 nəfərin 12,9%-i iştirak edib.

Bu arada, pozuntular haqqında məlumatlar daxil olur. Belə ki, Maştağa qəsəbəsində 108 saylı məktəbdə yaradılmış seçki məntəqəsində bülletenlər seçki yaşına çatmamış 8-10-cu sinif şagirdlərinə verilir. Bu barədə Azadlıq Radiosu seçici Kamran Qasımova istinadla məlumat yayıb.

“Saat 9-a qədər seçki qutuları bülletenlərlə dolmuşdu. Mənim özümə bir neçə bülleten vermək istəyirilər”, deyə Qasımov bildirib.

Məntəqə komissiyasının rəhbəri Sevinc Rufullayeva isə qanun pozuntuları haqqında məlumatı təkzib edib. Onun sözlərinə görə, yalnız “səs-küy salmaq” istəyən bir gənc olub, o, müəllimləri təhqir edib və gedib.

Səhiyyə Nazirliyi sistemindən bir həkim də Turan-ın müxbirinə bildirib ki, Yasamal rayonunda yaşasa da, rəhbərlik ona paytaxtın Nəsimi rayonunda səs verməyi əmr edib. Həm də bundan imtina edərsə, işdən qovulacağı ilə hədələyiblər.

Bir çox digər büdcə təşkilatlarının işçiləri və dövlət qulluqçuları da eyni vəziyyətdədir. -06D-