Yeri səhv düşmək faciəsi

“Şərq Tərəfdaşlığı” Vətəndaş Cəmiyyəti Forumunun Koordinasiya Şurası Batumidə keçirilən toplantısında Azərbaycan nümayəndə heyətinin davranışına dair etiraz bəyanatı yayıb.

Bəyanatda Forumun İdarə Komitəsi Azərbaycan Milli Platformasına daxil olan bəzi şəxslərin Batumidəki toplantıda yol verdikləri əməlləri kəskin pisləyiblər. Sənəddə Çexiyanın “People in Need” təşkilatı tərəfindən hazırlanan sərginin dağıdılması, Azərbaycanda repressiyalara etiraz olaraq qaldırılan plakatlar və vicdan məhbuslarının şəkillərinin cırılması, təşkilatçılara aqressiv münasibət bəslənilməsi kimi davranışlar yer alır. Bütünlükdə isə sərgi Azərbaycanda insan haqları və azadlıqlarının mövcud durumuna həsr edilib.

Sənəddə deyilir ki, Forumun İdarə Komitəsi Azərbaycan nümayəndə heyətinə daxil olan Səlim Babayevin üzvlükdən çıxarılması qərarı verib. Komitə bu qərarı təşkilatın nüfuzuna təhlükə törədən və ya ciddi ziyan vuran hərəkətlərə yol verilməsi ilə əsaslandırıb.

Bəyanatda “Yeni Müsavat” qəzetinin redaktoru Rauf Arifoğlu ilə bağlı mövqe də yer alır. R.Arifoğlunun tədbirə Forumun fəaliyyətini işıqlandırmaq üçün Azərbaycan Milli Platforması tərəfindən dəvət edildiyi deyilir. Sənəddə R.Arifoğlunun sərgi ilə bağlı Azərbaycan nümayəndə heyətindən 5 nəfər istisna olmaqla, qalanların tədbiri boykot etməsi, “lobbiçilik qalmaqalı”na görə Gürcüstan prezidentinin tədbirə qatılmaması, sərgilə bağlı insidentin Forumun İdarə Komitəsinin üzvü Boris Navasardyan tərəfindən idarə olunması haqda yaydığı xəbərlərə toxunulur. Sənəddə R.Arifoğlunun yaydığı bütün bu xəbərlər yalan adlandırılır.

Eyni zamanda, sənəddə “People in Need” təşkilatının nümayəndəsi, Forumun İdarə Komitəsinin üzvü İvana Skalova barədə R.Arifoğlunun ləkələyici məlumatlar yaydığı qeyd edilir. “Biz bu hadisəni təkcə Forumun İdarə Komitəsinə qarşı yox, bütövlükdə Vətəndaş Cəmiyyəti Forumuna qarşı əsassız hüsum hesab edirik”, - deyə bəyanatda mövqe ifadə edilir.

Daha sonra sənəddə Azərbaycan nümayəndə heyətinin tədbiri boykot edən üzvlərinin hərəkəti faktiki Assambleya üzvü kimi mandatlarından imtina etmələri sayılır. Bu addım həm də tədbiri boykot edən şəxslərin Azərbaycan Milli Platformasından Forum rəhbərliyinə nümayəndə seçmək üçün səsvermə hüququnu itirmələri adlandırılır. “Azərbaycan nümayəndə heyətinin üzvləri bu hadisə ilə əlaqəli izahat verməlidir və yalnız bundan sonra onlar səs hüquqlarını bərpa edə bilərlər”, deyə son olaraq sənəddə qeyd edilir. -05D-