Zakir Həsənov düşmənin hərbi hədəflərinin məhv edilməsinə hazır olmağı tapşırıb

Bakı/21.09.2016/Turan: Azərbaycanın müdafiə naziri Zakir Həsənov düşmənin bütün ərazisindəki strateji və hərbi təyinatlı obyektlərə nəzarətin gücləndirilməsi, zərurət yaranarsa onların əhəmiyyətinə görə dərhal məhv edilməsinə hazır olmaqla bağlı tapşırıq verib. Bu barədə nazirliyin rəsmi saytı məlumat yayıb.

Turan xəbər verir ki, tapşırıq Müdafiə Nazirliyinin rəhbər heyətinin iştirakı ilə keçirilən müşavirədə verilib.

Müşavirədə regionda yaranmış hərbi-siyasi vəziyyət təhlil edilərək müəyyən olunmuş əsas istiqamətlər üzrə kəşfiyyatın bütün növlərinin gücləndirilməsi ilə düşmən ərazisindəki yeni hədəflərin aşkar olunması, onların əhəmiyyətinin qiymətləndirilməsi və məhvedilmə ardıcıllığının müəyyənləşdirilməsinə diqqət yönəldilib.
Quru Qoşunlarının birlik və birləşmələri, Hərbi Hava Qüvvələri, Raket və Artilleriya Qoşunları, Xüsusi Təyinatlı Qüvvələr, Silahlı Qüvvələrin digər növ və qoşun qisimlərinin qarşılıqlı fəaliyyətinin artırılmasının vacibliyi qeyd olunub.

Nazir bildirib ki, Silahlı Qüvvələrin sərəncamında olan raket-artilleriya qurğu və sistemləri bu tapşırıqları dəqiqliklə yerinə yetirməyə imkan verir. –71D-