Hökumətə sosial mənzillərin qiymətlərini azaltmaq təklif edilir

Növbəti bazar ertəsi saat 10.00-da sosial evlərin satışı başlayır. Mövcud qaydalara əsasən, ilk müraciət edənlər mənzilə sahib ola biləcəklər. "Güzəştli mənzillərin kvadrat metrinin qiymətləri müraciət edənlərin ən çox müzakirə etdiyi məsələlərindən biri olaraq qalır", - deyə İqtisadi və Sosial İnkişaf Mərkəzinin sədri Vüqar Bayramov Turan-a bildirib.

Müsahib xatırladıb ki, ƏDV daxil olmaqla 1 otaqlı mənzillərin qiyməti 29 925 manatdan, 2 otaqlı mənzillərin qiyməti 47 282 manatdan, 3 otaqlı mənzillərin qiyməti 65 626 manatdan başlayacaq. Sosial ipoteka krediti hesabına mənzilləri alan zaman aylıq ödənişlər 1 otaqlı mənzil üçün 129-136 manat, 2 otaqlı mənzil üçün 203-236 manat, 3 otaqlı mənzillər üçün isə 282-288 manat olacaq.

"Mənzillərin qiyməti həmin ərazidə yerləşən anoloji mənzil ilə müqayisədə aşağı olsa da, İqtisadi və Sosial İnkişaf Mərkəzi olaraq hökumətə sosial mənzillərin qiymətinin ucuzlaşması ilə bağlı təkliflərimizi təqdim etmişik", - deyə iqtisadçı bildirib. Təklif edilir ki, dövlət sosial mənzillərin inşası ilə bağlı xərcin bir hissəsini öz üzərinə götürsün.

İSİM hesab edir ki, xərcin kompensasiya edilməsi nəticə etibari ilə qiymətin aşağı düşməsinə gətirib çıxardacaq. Mənzillərin xərcinin üçdə biri dövlət hesabına kompensasiya edilə bilər. Burada əvəzsiz kompensasiyadan söhbət gedir. Bu, sosial kredit üçün ödənilən aylıq ödənişlərin də qiymətinin aşağı düşməsinə səbəb olacaq. Bu halda 1 otaqlı mənzilin qiyməti 19950 manata, 2 otaqli mənzilin qiyməti 31521 manata, 3 otaqli mənzilin qiyməti isə 43750 manatadək azalacaq. Buna uyğun olaraq aylıq ödənişlər orta hesabla 1 otaqlı mənzil üçün 87 manata, 2 otaqlı mənzil üçün 147 manata, 3 otaqli mənzil üçün isə 188 manatadək azala bilər.

"Bu isə aztəminatlı ailələr üçün daha məqbul hesab oluna bilər. Neftin mövcud yüksək qiymətləri fonunda ölkədə gəlirlərin artıdığını nəzərə alsaq, bu subsidiya üçün maliyyə mənbəsinin tapılması da çətin deyil", - deyə Bayramov bildirib.

Xatırladaq ki. Mənzil İnşaatı Dövlət Agentliyi paytaxtın Yasamal rayonunda yeni yaşayış kompleksində mənzillərin satışını elan edib. Söhbət 1, 2, 3 və 4 saylı binalarda mənzillərin satılmasından gedir. "Yoxsullar üçün mənzil"in qiyməti ekspert dairələrində tənqid mövzusu olub. İqtisadçı Samir Əliyev Turan-a müsahibəsində bildirib ki, dövlət layihəsinin bir hissəsi kimi tikilən mənzilləri güzəştli (kvadrat metri 940-950 manat) adlandırmaq çətindir.

Ekspertlərin fikrincə, bu cür qiyməti özəl tikinti şirkəti qoysa, normal olardı. Amma burda söhbət dövlət resurslarına çıxışı olan, eləcə də qeyri-rəsmi ödənişlərdən azad olan Mənzil İnşaatı Dövlət Agentliyindən gedir. -0-