ABŞ erməni diasporu: 5+2 şərti ilə razılaşsın

Los Angeles-dən özəl mənbələrdən alınan məlumatlara görə Kaliforniyanın erməni diaspor təşkilatlarının rəhbərləri Ermənistanın baş naziri Nikol Paşinyana tövsiyə məktubu göndəriblər. Uzun müddət Ermənistanın idarə edilməsində və Qarabağda Azərbaycan torpaqlarının işğalında mühüm rol oynayan Amerikadakı erməni diaspor təşkilatlarının baş bilənləri paşinyana tövsiyə ediblər ki, Azərbaycanın təklif etdiyi 5+2 şərti ilə razılaşsın.

Öz qırğı siyasəti ilə münaqişəni qızışdırmış erməni başbilənləri Azərbaycan ordusunun uğurlu hərbi əməliyyatlarından sonra bu fikrə gəliblər. Amma yubanıblar. Nəzərdə tutulan həmin beş rayonun dördünü artıq Azərbaycan ordusu döyüş yolu ilə azad edib, biri də yəqin bu günlərdə azad ediləcək.

Los Angeles ermənilərinin bu fikrə gəlməsi hərbi əməliyyatlar başlayandan "Little Armenia"dan 20 nəfərə qədər Amerika vətəndaşı olan erməninin döyüş meydanında həyatını itirməsi ilə bağlıdır. Beynəlxalq hüquq baxımından etnik mənsubiyyət baxımından bir ölkənin vətəndaşının digər ölkənin apardığı hərbi əməliyyatda iştirakı beynəlxalq terrorçuluq əməlidir.

İkincisi, Azərbaycan ordusunun işğalçıları öz ərazilərindən təməzləməsi prosesində əldə etdiyi uğurlar beynəlxalq şərtləri də Azərbaycanın xeyrinə dəyişmişdir. 28 il imitasiya siyasəti aparan, işğalçı ilə işğalın qurbanın eyniləşdirən Minsk Qrupunun həmsədrləri əvvəlki əsəbi bəyanatlardan fərqli olaraq son vaxtlar "bitərəflik" və ya "fəal bitərəflik" mövqeyinə üstünlük verirlər. Həmsədr ölkə başçılarının belə mövqe sərgiləməsi Yerevanda böyük məyusluq yaradıb.

Üçüncüsü, uzun müddət Ermənistanın və Qarabağ separatçılarının istinad etdiyi "öz müqəddəratını təyin etmə" prinsipi artıq arxa plana keçirilir. ABŞ-ın NATO-dakı səfiri açıq şəkildə bəyan etdi ki, dövlətlərin ərazi bütövlüyü və suverenliyi aparıcı prinsipdir və Qarabağdakı olaylara da məhz meyarla yanaşılmalıdır. Ermənilərin artıq "təyini müqəddərat" spekulyasiyasının limiti tükənib. İndi hamı bilir ki, məqsəd ərazi işğalı, sərhədlərin genişləndirilməsi idi, "təyini müqəddərat" demoqogiyası deyildi.

Dördüncüsü, Ermənistanın olaylara xristian-müsəlman qarşıdurması donu geyindirmək cəhdləri də iflasa uğradı. Məlum oldu ki, dünya xristianlarını "qorumaq" iddiasında olan Ermənistana ən böyük yardımı dünya müsəlmanlarının ən böyük "keşişikçisi" roluna iddialı olan İran İslam Respublikası göstərir. Bu illər ərzində beynəlxalq sanksyalara məruz qalan Tehran istər Ermənistanın, istərsə də Dağlıq Qarabağ separatçılarının leqal və qeyri-leqal yollarla qida və sənaye məhsullar, yanacaq və digər strateji məhsullarla təchizatında önəmli rol oynayıb.

Beşincisi, Ermənistanın Azərbaycanı hərbi əməliyyatlarda Suriya yaraqlılarından istifadə də günahlandırması cəhdləri tam iflasa uğradı. Hansısa bir fakt ortaya qoya bilmədilər. Bu barədə Paşinyana sual verəndə deyir bu artıq təsdiq edilmiş fakdır və bütün mətbuat bu barədə yazır. Köhnə erməni dəsti xəttidir. Əvvəl yalanı mətbuata ötürürlər, sonra da ona fakt kimi istinad edirlər. Amma bunun əksinə olaraq xarici ermənilərin işğal olunmuş Azərbaycan ərazilərində yerləşdirilməsi barədə yüzlərlə fakt var. BBC-nin rus xidməti (Marina Katayeva) bu günlərdə Laçının işğal olunmuş ərazilərində Livan və Suriyadan gətirilmiş 300 ermənin məskunlaşdırıldığın, erməni hakimiyyətinin onlara torpaq sahəsi ayırmasın və ev tikməsin böyük "humanist" addım kimi təqdim edir. Amma nəzərə almır ki, beynəlxalq hüquq işğal edilmiş ərazilərin məskunlaşdırılmasını qadağan edir, bu beynəlxalq cinayət əməlidir. Ermənistan həmin 300 nəfər Suriyalı və Livanlını niyə öz ərazilərində deyil, Azərbaycan ərazilərində torpaq sahəsi ayırır? Və əksinə olsaydı, şübhəsiz ki, Azərbaycan ordusunun öz torpaqlarını işğaldan azad etməsinə qarşı əlində Kalaşnikov avtomatı ilə poza verən keçmiş Livan bərbəri Arum dinc əməklə məşğul olar, Ermənistanda daha çox baş qırxa bilərdi.