Fransa prezidentinə nə dedim

“Ümumiyyətlə belə qəbul edilir ki, bu, Omaha-Biç və Kolvil-sür-Mer məzarlığında dəfn edilənlərin uğruna öldükləri qaydaları pozur.  Onlar nə üçünsə öldülər. Onlar bu düzənin qurulması üçün öldülər, bizim daha yaxşı dünyaya sahib ola bilməmiz üçün öldülər", - Birləşmiş Qərargah Rəisləri Komitəsinin sədri, ordu generalı Mark Milli bazar ertəsi Fransanın şimal-qərbindəki Kolvil-sür-Mer kəndində sahilə baxan Amerika qəbiristanlığında çıxış edərkən deyib.

Birləşmiş Ştatlar və onun müttəfiqləri nasistlərin üzərində qələbəsi ilə yeni dünya düzəninin və “ən yaxşı” dünyanın qurulmasına yardım edən “D” günü  əsgərlərinin irsinə hörmət olaraq Ukraynaya “mühüm” dəstəyi verməyə davam edəcək”, - o bildirib.

Normandiyada Omaha çimərliyinə baxan Associated Press-ə müsahibəsində Milli deyib ki, Rusiyanın Ukraynaya qarşı müharibəsi İkinci Dünya Müharibəsindən sonra müttəfiq ölkələrin müəyyən etdikləri qaydaları pozur. O, faşist Almaniyasının işğalının devrilməsinə səbəb olan “D” günündə Fransanın çimərliklərinə müttəfiq qoşunların daxil olmasının 78-ci ildönümündən danışıb.

Mən də təxminən eyni şeyləri Rusiyanın Ukraynaya ilk təcavüzündən sonra 2014-cü ilin mayında Bakıda Fransa prezidenti Fransua Ollanda demişdim.

Bu barədə 29 may 2014-cü il tarixində «Fransa prezidentinə nə dedim» məqaləsində yazmışdım. Görünür, hələ o zaman deyilənlər bu gün Ukraynada davam edən faciə ilə daha çox uzlaşır.

«Cənab prezident, Siz Rusiya prezidenti Vladimir Putini İttifaq qoşunlarının Normandiyaya çıxarılmasının 70 illiyi mərasiminə dəvət etmisiniz.

Prezident Putin kimi təmsil edəcək?  Rusiya xalqını, yoxsa bütün keçmiş SSRİ xalqlarını? Fransa onu 60 illiyə dəvət edəndə bu, başa düşülən idi. O vaxt adətən, Rusiyanın sədrlik etdiyi MDB-də hansısa daxili razılıq var idi. Amma bu gün Rusiyanın Gürcüstan və Ukraynaya təcavüzünün, digər “qardaş” respublikalara təhdidinin şahidiyik.        

Cənab prezident, rəsmi statistika göstərir ki, II Dünya Müharibəsi zamanı SSRİ-də rusların sayı 99 million, başqa xalqların sayı 70 milliondan yuxarı olub. Amma son illər ruslar bu qələbəni və başqa xalqların ona töhfəsini özəlləşdirir. Onlar hətta sovet filmlərini göstərməyi dayandırıb, qələbəni rusların nailiyyəti kimi təqdim edirlər. Bəyəm Stalin rus idi? SSRİ rəhbərliyində və ordusunda çoxlu sayda qeyri-rus vardı.   

Aydın dərk edilməlidir ki, azərbaycanlılar, ermənilər, gürcülər, qazaxlar, başqa xalqlar öz torpağında yox, Rusiya ərazisində qan töküb. Almanlar torpaqlarımızı ələ keçirsəydi, nə olacaqdı – bu, başqa məsələdir. Tarixdə felin lazım forması yoxdur. Bu, faktdır ki, başqa xalqların milyonlarla nümayəndəsi Rusiya və başqa ölkələrin ərazisində həlak olub. Onlar Normandiyada təmsil olunmaq haqqına malikdir.

Çox istərdim ki, Putin Ukraynada törədilən hadisələrdən sonra keçmiş sovet respublikaları prezidentlərinin hər birinin, xüsusən Ukrayna prezidentinin gözlərinə baxsın. Mən çox istərdim ki, ruslar görsünlər və anlasınlar ki, bu gün alçaltmağa cəhd elədikləri adamlar bu müharibədə öz əsgərlərinin həyatını qurban vermiş xalqları təmsil edirlər".