Hüquq müdafiəçisinin prezidentə müraciətinin izi ilə

Bakı/21.09.21/Turan:  Bakının Sabunçu rayon sakini, 61 yaşlı Elşən Həsənov 2011-ci ildə icazəsiz etiraz mitinqinin təşkili və iştirakı ittihamı  ilə iki il müddətinə azadlıqdan məhrum edilmişdi. Bu iş üzrə mühakimə olunan bütün məhkumlar kimi o da  Amnesty İnternational beynəlxalq hüquq- müdafiə təşkilatı tərəfindən  "vicdan məhbusu" kimi tanınıb.

Həbsxanada onun orduda xidmət etdiyi dövrdən 2-ci qrup əlilliyi təsdiqlənib. Bədən Tərbiyəsi İnstitutunun məzunu olaraq əlilliyə və 21 illik iş stajına görə pensiya alıb.

Həbsxanadan çıxdıqdan sonra Siyasi Məhbusların Monitorinq Mərkəzi hüquq- müdafiə təşkilatını yaradıb, Azərbaycanda siyasi məhbusların siyahısını tərtib edib.

Bu il Əmək və Əhalinin Sosial Müdafiəsi Nazirliyi minlərlə digər vətəndaş kimi Həsənovu da pensiyadan məhrum edib və bunu yeni sosial təminat sisteminin tətbiqilə izah edib. Həsənov yaşamaq üçün vəsaitdən tamamilə məhrum olub.

2021-ci il iyulun 22-də prezident İlham Əliyevə məktub yazıb. Yeri gəlmişkən, məktəbdə onunla paralel sinifdə oxuyub. Məktubda qeyd edib ki, bir halda ki dövlət onu pensiyadan məhrum edir, o da işlə təmin olunmasını xahiş edir.

Həsənov üçün gözlənilmədən, avqustun 17-də Sabunçu rayon icra başçısının köməkçisi ona zəng edib və görüş təyin edib. Növbəti gün görüş zamanı köməkçi Həsənova bildirib ki, onun dövlət başçısına göndərdiyi məktub Sabunçu Rayon İcra Hakimiyyətinin başçısı Adil Vəliyevin şəxsi nəzarətinə götürülüb və onun işədüzəlmə məsələsi həll olunacaq.

Bundan sonra Həsənovun rayonun təhsil və idman müəssisələrinin direktorları ilə görüşləri olub. Hər bir direktor Həsənovun işə qəbul edilməsinin mümkünsüzlüyü barədə öz dəlillərini təqdim edib.

Həsənov yaşamaq üçün vəsaitdən məhrumdur, çünki nə maaş alır, nə də pensiya. Həsənov hesab edir ki, rəhbərlik onun probleminin həllilə bağlı Prezident Administrasiyasının göstərişini qəsdən sabotaj edir.

Həsənov bunu şadlıq saraylarının sahibi olan rayon rəhbəri Vəliyevin gizli mülkiyyəti, evlərin renovasiyası üzrə "pilot layihələr”də  "maraqları" və sair barədə  Facebook-da tənqidi yazıları ilə əlaqələndirir. 

Turan-ın şərh üçün Sabunçu İcra Hakimiyyətinə müraciətinə cavab olaraq Vəliyevin köməkçisi deyib ki,  Elşən Həsənov onunla əlaqə saxlayaraq hələ də işə düzəlmədiyini bildirməliydi.  Köməkçi Həsənovun müraciətinə rayon icra başçısının nəzarət etdiyini xatırladıb və  agentliyə söz verib ki, indi Turan ilə söhbətdən sonra Həsənovun vəziyyətindən xəbərdar oldular və onun işi ilə məşğul olacaqlar.–06D-