Nazarbayev harasıyla düşünür?

Paytaxtın adının öz şərəfinə dəyişdirilməsi, görünür, təsadüfi əlamət deyilmiş, bu vəziyyətin ciddiliyinə dəlalət edir. Nazarbayevin Ermənistanın həbs edilmiş sabiq prezidenti Robert Koçaryana göndərdiyi məktub haqqında xəbəri eşitdikdə ağla gələn ilk fikir belədir.

RİA-Novosti-nin məlumatına görə, Nazarbayev öz məktubunda "şəxsi əlaqələrin davam edəcəyinə" ümid etdiyini qeyd edir.

Mənbənin məlumatına görə, Nazarbayev hətda məktubda Koçaryana Qazaxıstanda baş verən siyasi dəyişikliklər və proseslər barədə məlumat verir.

Daha sonra Qazaxıstan lideri "səmimiyyətlə birgə işlədikləri illəri yada salır" və "Koçaryanla şəxsi əlaqələrin davam edəcəyinə" ümidini dilə gətirir.

Siyasətdən "uzaqlaşmış" Nazarbayev birdən-birə niyə Koçaryanı yada salıb? Niyə ona şəxsi məktub yazmaq ehtiyacı duyub? "Əlaqələrin davam edəcəyinə ümid edirəm" ifadəsi nə deməkdir? Harada, həbsxanada?

Nazarbayevin Koçaryan haqqında hansı səmimi xatirələri var ki, onlar birlikdə belə xoş yadda qalan nə ediblər? Niyə Koçaryan həbsindən bir neçə ay sonra Nazarbayevin yadına düşüb?

80 yaşlı qocanın marazmının artdığını güman etsək, suallar öz-özlüyündə aradan qalxacaq, amma, deyəsən, hər şey bu qədər də bəsit deyil.

Bir şey aydındır: bu, rəsmi Yerevanın xoşuna gəlməyəcək. Amma Yerevandan başqa, bundan narazı olacaq bir də Bakı var.

Elbası (Nazarbayev özünü belə adlandırır) Koçaryanın Azərbaycan qarşısındakı "xidmətlərindən" xəbərsiz ola bilməz. Yaxşı, bəs Azərbaycan xalqına açıq-aşkar hörmətsizlik nümayiş etdirən Nazarbayevin hansı maraqları ola bilər?

Emosiyalardan uzaqlaşsaq, ehtimal etmək olar ki, Elbası bu axmaqlığı istənilən yolla Koçaryanı həbsdən çıxarmağa çalışan "böyük qardaşının" xahişi ilə edə bilərdi. Qoca Nazarbayevdən Moskvanın Koçaryanın müdafiəsi üzrə səylərinin birtərəfli görünməməsi üçün belə bir xahiş edilməsi istisna deyil.

Buna qədər Vladimir Putin Köçəryana isti məktublar və Yeni İl münasibəti ilə təbriklər göndərirdi, şəxsən baş nazir Paşinyandan dostu kimi Koçaryanı azad etməyi xahiş edirdi.

Bu məntiqə əsasən, tezliklə digər KTMT üzvlərinin də həbsdə olan Koçaryana dəstək məktubları yazacaqlarını gözləmək olar.

Daha ətraflı baxsaq, baş verənləri Paşinyan hökumətinə təzyiq göstərmək səylərinin davamı və böyük qardaşın Yerevanın Qərbyönlü siyasətinin güclənməsinə reaksiyası kimi qiymətləndirmək olar.

Ermənistanın ikinci prezidenti Robert Koçaryan ötən ilin iyulunda 1 mart 2008-ci il etiraz aksiyalarının dağıdılması haqqında cinayət işi çərçivəsində konstitusiya dövlət quruluşunun dəyişdirilməsi ittihamı ilə həbs edilib. Bundan sonra məhkəmələr üç dəfə onun həbs müddətini uzadıb.

Azərbaycanda Koçaryan sadəcə Qarabağ separatçılarının lideri deyil, Azərbaycana qarşı hərbi cinayətlər törətmiş, işğalda və etnik təmizləmələrdə fəal iştirak etmiş şəxs hesab olunur.