Paşinyana müraciət etdim, polislər gəldilər, Əliyevə müraciət etdim..Və budur

Dünən mənim onillik həmkəndlim iki məktub gətirdi. Hər ikisində cərimə tətbiqi barədə bildiriş vardı, biri Ermənistanın baş naziri Paşinyana yazdığım 6 noyabr 2020-ci il tarixli açıq məktubun dərcinə görə, digəri isə bu mətni FB–dən çıxarmaqdan imtina etdiyimə görə. İndi, bu hadisədən yeddi ay sonra polis məni haqq-hesaba çağırır, əks halda sonradan müsadirə edilməklə əmlaka həbs qoyulacaq. Eyni zamanda kinoda olduğu kimi, nə polislər, nə də poçtalyon mənimlə görüşməyə risk etməyiblər, uşağı göndəriblər, çünki bilirdilər ki, onu məyus edə və "mühüm" məktubları götürməyə bilmərəm.

Mən İcevan polisinin istinad etdiyi kimi, hərbi vəziyyət haqda Ermənistan Respublikası hökumətinin qərarını pozduğumla razı deyiləm. Bu barədə polisə məlumat verdim və hələ keçən ilin noyabrında açıq şəkildə yazdım, yazılı əsaslandırma tələb etdim. Amma mənim evimə gələn polislər yazının çıxarılmasına nail olmaq üçün yalnız şifahi sövdələşdilər, hətta söz verdilər ki, əgər çıxarsam, heç bir cərimə olmayacaq. Baxmayaraq ki, 1 milyon dram (təxminən 2000 dollar) mənim üçün böyük məbləğdir, mən sövdələşməyə getmədim. Çünki hesab edirəm ki, açıq məktubumda vəzifəli şəxsi tənqid yoxdur (cərimə məhz tənqidə görə qoyulub), əksinə, mən bir vətəndaş kimi bu məktubla müharibəni dayandırmaq və danışıqlara başlamaq səylərinə öz dəstəyimi ifadə etmişəm.

Zərflərdə 22 may 2021-ci il tarixi göstərilib, kağızlarda cərimənin tətbiqinin tarixi 7 noyabr 2020-ci il göstərilir, oğlan məktubu dünən, mayın 27-də gətirib. Mən bir az çaşdım, etiraz müddətini hansı tarixdən hesablayacağımı bilmədim.

Əgər zərfə görə olsa, mən artıq 30 gündən 5-ni itirmişəm. İstənilən halda, məhkəmə çəkişməsi açmaq üçün İcevanın vəkil bürosuna müraciət etmək niyyətindəyəm. İndi Nikol Paşinyana növbəti açıq məktubu yazıram, xahiş edirəm ki, o 6 noyabr tarixli məktubumda öz ünvanına tənqid görüb-görmədiyini və polisin mənim hərbi vəziyyətin şərtlərini yerinə yetirməmlə bağlı durumu düzgün şərh edib-etmədiyini bildirsin.

Belə güman etməyə əsasım var ki, cərimə tətbiqi siyasi repressiyaların bir hissəsidir ki, mən Almaniyadan müvəqqəti sürgündən qayıtdıqdan və yazı dərc etməyə, müsahibə verməyə başladıqdan sonra bərpa edilib. Bu gün sülhyaratma üçün mənim başqa imkanım yoxdur.

Mən statusu silməkdən imtina etdikdən dərhal sonra məni ölümlə, o cümlədən yaxınlarımın ölümü ilə  hədələyən anonim məktublar almağa başladım. Bununla bağlı prokurorluğa və polisə müraciət etdim, nəticəsi olmadı. Bundan əvvəl onlar mənim itimin ölümü ilə bağlı işi bağladılar.

Ermənistanda uzun illərdir ki, hakimiyyət özbaşınalığı ilə qanunsuz qruplaşmalar fəaliyyət göstərir, onlar informasiya terroru törədirlər, insanlara fiziki hücum edirlər. Ermənistan-Azərbaycan münaqişəsi və Türkiyə ilə münasibətlər barədə düşünən, fikir söyləyən hər kəs onların qurbanına çevrilə bilər. Bu cinayət fəaliyyətinə hüquq-mühafizə və digər idarələrin əməkdaşları cəlb olunurlar ki, onlar da təzyiqləri artırmaq üçün öz inzibati resurslarından istifadə edirlər.

Cərimədən etiraz üzrə məhkəmə prosesində öz hüquqlarımı qorumağa kömək edəcək bütün hüquq- müdafiə təşkilatlarına və hüquqşünaslara minnətdar olaram.

P.S. Yeni sevinməyə başlamışdım ki,  Gürcüstanla sərhəd açılıb, borclarımı ödəmək üçün, nəhayət, sürücü kimi çalışa biləcəm. Və budur,  maşına həbs qoyulması bir həftə sonra mənim fərdi karantinim olacaq. Eybi yox, ümid edirəm öhdəsindən gələrəm.

28.05.2021

***

Və bu da 1 000 000 dram qiymət qoyduqları məktubun mətni

Nerkin Saxkavan kənd sakininin Ermənistanın baş nazirinə müraciəti

Ermənistan Respublikası öz vətəndaşlarına qarşı törədilən cinayətlərin hüdudlarını çoxdan aşıb. Bu cinayətkar qələbə məzhəkəsinə son qoyun: qonşunu məğlub etmirlər, qonşunu tapdalamırlar, qonşunu məhv etmirlər. Qonşu ilə danışırlar, danışırlar, eyni dildə danışmaq qabiliyyəti olana qədər, qarşılıqlı anlaşmaya qədər danışırlar.

Qonşuların bir-birini məhv etmək inertiyası tərəflərin özlərini məhvə aparır. 

Unudun, "strateji müttəfiq"in xilasedici gücü haqda cinayətkarcasına yalandan imtina edin. Bu aramsız qırğınların yaşandığı bir şəraitdə cəfəng müttəfiq axtarışını, soyqırıma məruz qaldığınızı qəbul etdirmək üçün beynəlxalq birlikdən xəcalətli sədəqə ümidini unudun, kənara qoyun.

Hərəkətsizliyi aradan qaldırın, millətçi tabuların cinayət ətalətini aradan qaldırın.

Ötən 30 ildə bizim bir müttəfiqimiz ola bilərdi, əsasən də bu gün bizim bir müttəfiqimiz ola bilər və bu müttəfiq qonşu Azərbaycandır.

Danışın, qorxmadan öz həmkarınızın üzünə baxın.

Georgi Vanyan

Tavuş vilayəti, Nerkin Saxkavan kəndi,

6 noyabr, 2020-ci il