Apellyasiya Şurası özünü təsirli qurum kimi göstərməlidir

Azərbaycan Prezidenti yanında Apellyasiya Şurasının yaradılması sahibkarların əmin şəkildə sahibkarlıq fəaliyyəti qurmasına və inkişaf etdirməsinə imkan verəcək. Biznes araşdırmaları sahəsində ekspert, marketoloq Elnur Eyvazovun fikri belədir.  Sahibkarların hüquqlarının müdafiəsi üzrə beynəlxalq təcrübəni araşdıran və biznes üzrə ombudsman institutu təsis etməyi təklif etmiş Eyvazov Turan-ın müxbiri ilə söhbətində prezidentin fərmanını "sahibkarların dövlətə etibarını gücləndirən addım" kimi qiymətləndirib.

"Bir çox yerli və əcnəbi sahibkarlar sahibkarlıq fəaliyyəti qurarkən və inkişaf etdirərkən arxalarında dayaq axtarırdı. Buna görə Apellyasiya Şurası kiçik və orta sahibkarlğın inkişafına, qanunsuz reydlərin və yoxlamaların qarşısının alınmasına, korrupsiyaya qarşı mübarizəyə yardım edəcək, Azərbaycanda həm yerli, həm də xarici investorların sahibkarlığa marağını artıracaq, bu sahədə qanunvericiliyin təkmilləşdirilməsinə şərait yaradacaq", deyə Eyvazov bildirib.

Ən mühüm məqam odur ki, dövlət başçısı bilavasitə sahibkarların problemləri haqqında məlumatlandırılacaq. "Ola bilər ki, Apellyasiya Şurası müvafiq institutlarla birlikdə mövcud problemlərin həlli yollarının tapılmasına təşəbbüs etsin, sahibkarların maarifləndirilməsi üzrə proqramlar yaratsın və mövcud olan proqramlara nəzarət etsin. Ölkədə biznes mühitinə etibarı yalnız dövlət başçısı qaytara bilər. Bu gün ölkə rəhbərliyinin sahibkarlığa, iqtisadiyyatın inkişafında onun potensialına diqqətinin artdığını əminliklə demək olar. Buna görə son vaxtlar bütün görüşlərdə prezident bürokratik məmur aparatını sərt, bəzən amansız tənqidə məruz qoyub", deyə Eyvazov bildirib.

Şura ilk gündən özünü sahibkarlara və investorlara dayaq kimi göstərməlidir. Dövlət məmurlarının, icra orqanlarının Şuranı nöqsanların aradan qaldırılmasına təsir göstərən qurum kimi görməlidir, Eyvazov belə hesab edir.

Şura sədrinin və səkkiz üzvün hamısının çətinliklərlə yaxından tanış olan müxtəlif sahələrdə işləyən sahibkarlardan təyin edilməsi yaxşı olardı.

"Ən azından hər rübdə və ilin sonunda Şura dövlət başçısına və ictimaiyyətə daxil olan şikayətlər və onların araşdırılmasının nəticələri haqqında statistika məlumatları verməlidir. Sahibkarlar, cəmiyyət təhlükəsizliklərinə zəmanət hiss etməli, problemləri ilə bağlı əminliklə Şuraya müraciət etməlidirlər.

Biz dəfələrlə özbaşınalıq haqqında yuxarı instansiyalara şikayət etməyə çalışan sahibkarlardan yerli icra orqanlarının qisas alması halları haqqında eşitmişik", deyə Eyvazov sonda qeyd edib. -06D-