Cəmil Həsənli: Hakimiyyət dialoqa hazır deyil

“Son 10 ildə demokratiyanın geriləməsi prosesi baş verir. İlk növbədə, bu geriləmə müxalifət partiyalarına, əlbəttə, gerçək müxalifət partiyalarına qarşı mübarizə ilə səciyyələnir”. Bu barədə Milli Şuranın sədri Cəmil Həsənli Obyektiv televiziyasına (www.obyektiv.tv) müsahibəsində bildirib.

Onun fikrincə, Azərbaycan hakimiyyəti bütün dövlətin resurslarından istifadə edərək, müxalifətin zəiflədilməsinə nail olub. “Amma hakimiyyət bütövlükdə daha böyük bir müxalif güclə qarşılaşdı. Bu, xalqın müxalifətidir. Biz bunu seçkilər dövründə açıq-aydın gördük. İlk dəfə olaraq ATƏT-in Varşava Bürosu bəyanat yaydı ki, Azərbaycanda seçki  saxtakarlığı 58 faizdir. Xalqın içərisində dayağı olan hakimiyyət belə bir şeyə yol verməməli idi. Deməli 58 faiz saxtakarlıq varsa, hakimiyyətin xalqın içərisində dayağı yoxdur”.

Həsənli deyib ki, indiki durumda müxalifət partiyaları daim təzyiq altında işləyir və müstəqil qeyri-hökumət təşkilatlarına qarşı böyük bir səlib yürüşü elan olunub. “Həbslər dalğası gün-gündən genişlənir. Məsələn, 10-15 il qabaq bu kimi məsələlər məhkəməyə çıxarılanda 1-2 il iş verirdilərsə, indi 7 il, 8 il 6 ay iş verirlər. Bunlar hamısı Azərbaycanda avtoritarizmin yumşaq demokratiyaya keçməsini şərtləndirən əlamətlərdir”.

O hesab edir ki, ötən ilin 9 oktyabrında iki yol var idi. Bunun biri yumşaq demokratiyaya, digəri isə yumşaq diktaturaya keçid idi. “İndiki dövrdə yumşaq demokratiyaya keçid imkanları var. Bunun üçün islahatlar getməlidir. Siyasi, sosial, iqtisadi, inzibati idarəçilik islahatları getməlidir. Məsələn, təsəvvür edin ki, Ümumdünya Ticarət Təşkilatına qoşulmaq üçün Azərbaycan ya 300 qanun qəbul etməli, ya da mövcud qanunlara dəyişiklik etməlidir. Hazırda bunun heç 3-də biri olmayıb. Ona görə ki, hakimiyyətin bunu etməyə daxili istəyi yoxdur. Hakimiyyət buna daxilən ehtiyac duymur. Bilirsən, nəyə görə ehtiyac duymur? Hakimiyyət dialoqa hazır deyil”.

Milli Şuranın sədri media azadlığından danışarkən deyib ki, İctimai Televiziya bütün tərəfləri təmsil etməlidir. Cəmiyyət 3 qütbdən ibarətdir: hakimiyyət, müxalifət, ictimaiyyət. “Bu günləri, mən hələ qalan televiziyaları, özəllər də daxil olmaqla, demirəm, İctimai Televiziya hakimiyyətin tam nəzarətindədir. Axırıncı dəfə müxalifət nümayəndəsini orada nə vaxt görmüsünüz? Yəni bizim seçki təcrübəsi göstərdi ki, hakimiyyətin xalqın içərisində dayaqları elə də möhkəm deyil. İlham Əliyevin 10 il ərzində yaratdığı mifi biz 10 dəqiqədə dağıtdıq. Televiziyalara total nəzarət qoyulması, müxalifətin televiziyalardan kənar saxlanmasının səbəbləri də bununla bağıdır”.

O, təəssüflə bildirib ki, hakimiyyət media yarada bilməyib. “Media ictimaiyyət arasında müəyyən bir siyasətin təbliğ olunmasıdır. Əgər hakimiyyət mətbuatının saytında hansısa bir yazını 9 nəfər oxuyubsa, bunun nəyi mediadır? Media “Zerkalo” qəzeti idi, bu vəziyyətə saldılar. Media “Azadlıq” qəzetidir, hakimiyyət bütün gücü ilə ona qarşı mübarizə aparır, -  qəzetin satış pullarını qaytarmır, məhkəmə çəkişmələri ilə susdurmaq istəyir, jurnalistləri təqib edir və s. Media budur”.

Həsənlinin fikrincə, hakimiyyət media yarada bilmədiyi üçün öz siyasətini vaxtı ilə müxalifətin düşərgəsində olmuş adamların rəhbərlik etdiyi media qurumları ilə həyata keçirmək istəyir. “O adamlar ki, uzun müddət müxalifətin içində olublar, ekstremal şəraitdə işləyiblər. Məsələn, APA-dır, Publika.az-dır və s. Amma müxalifətin hədəf götürülməsi onunla bağlıdır ki, Azərbaycan hakimiyyəti çoxpartiyalı sistemə hazır deyil”.

Həsənli hesab edir ki, hakimiyyətin totalitar düşüncəsi var. “Ölkədə qeyri-məhdud bir korrupsiya var, ölkənin təbii sərvətləri məhdud sayda adamlar tərəfindən mənimsənilir. Yüzlərlə bu barədə faktlar açılıb. Adamların bank nömrələrinə, xaricdə aldığı böyük mülklərə qədər, bunların ünvanlarına qədər hər şey ortadadır. Mən hansısa bir zəhmətlə qazanılan vəsait hesabına nəyinsə alınmasının əleyhinə deyiləm. Amma bunun izahını versinlər ki, məsələn yüz milyonlarla qiyməti olan mülklər ildə ən çoxu 30 min manat gəliri olan bir vəzifə sahibi tərəfindən necə alınır? Bəlkə bunun izahını versinlər. Ona görə də  hakimiyyət və yaxud da onun əlində olan, - mən media deməzdim, kağız-kuğuz bunu etməyə borcludur”.

Həsənli bildirib ki, iqtidar feodal üsul-idarəsi yaratmaq istəyir. “Heç kəs ağzını açmasın, ağzını açanın cibinə narkotik atırlar, evinə, maşınına silah atırlar. Çünki bunlara belə gəlir ki, adamlar qərbdən qaynaqlanıb belə fikrilərə düşürlər, hakimiyyəti tənqid edirlər. Mənim yadımdadır, 2008-ci ildə Rusiyanın Gürcüstana müdaxiləsindən sonra Azərbaycan rəhbərliyində belə bir fikir əmələ gəldi ki, artıq Rusiya regionda öz mövqelərini bərpa edir, yəqin ki, bir 30-50 il belə olacaq. Ona görə də qərbin üzərinə yerimək lazımdır. Həmin dövrdə bir çox vəzifəli adamlar Amerika və Avropa universitetlərində oxuyan uşaqlarını çıxarıb gətirdilər. Bu, natamamlıq kompleksidir. Qərb azad seçki istəyir, Yeni Azərbaycan Partiyasının bu azad seçki necə xoşuna gələ bilər? Qərb siyasi məhbuslarsız Azərbaycan istəyir. Bunların isə hikkəsi o boydadır ki, gərək ağzını açanı tutub bassınlar. Qərb ölkənin faydalı qazıntılarından vətəndaşın faydalanması haqqını istəyir. Bütün bunları biz Azərbaycanda görmürük. Nə qədər ki, Azərbaycanda azad, ədalətli, demokratik bir cəmiyyət yoxdur, hakimiyyəti ələ keçirən güruh həmişə qərbin əleyhinə olacaq”, deyə o qeyd edib. -03B-