Ekspert: «Qarabağda status-kvo Azərbaycanın xeyrinə dəyişir»

Cəbhədə barışıq təkcə qoşunların təmas xəttində dəyişikliyi müəyyən etmədi, həm də münaqişənin özündə status-kvonu müəyyən etdi. Bu fikri hərbi ekspert Azad İsazadə Turan-a müsahibəsində söyləyib.

“Azərbaycan ordusu nə qədər irəliləyə bildi” sualının cavabında A.İsazadə deyib ki, dəqiq məlumata malik deyil. Lakin hərbi üstünlüyə nail olunması təkcə qoşunların irəliləmə məsafəsi ilə ölçülmür, mühüm strateji yüksəkliklərin tutulması ilə ölçülür.

Azərbaycan ordusu Qarabağın şimalında və cənubunda bəzi strateji yüksəklikləri tutaraq möhkəmlənə bildi ki, bu da geniş ərazilərə nəzarət etməyə imkan verir. Bundan əlavə, bu yüksəkliklər Azərbaycanın bəzi yaşayış məntəqələrini təhlükəsiz olmasına imkan verir.

Son hərbi əməliyyatlar Qarabağ münaqişəsində status-kvonu dəyişdirdi.

“Bu illər ərzində erməni tərəfi bəyan edirdi ki, Azərbaycan cəbhədə mövcud durumu dəyişməyə qadir deyil. Bu, danışıqlarda erməni tərəfə üstünlük verirdi və erməni tərəfi də inadkarlıq nümayiş etdirirdi.

Bu gün Azərbaycan bu vəziyyəti dəyişərək göstərdi ki, müstəqil geriyə baxmadan hərbi əməliyyatlar keçirə bilər və uğur qazanar.

Ermənilərin keçilməz müdafiəsi var və Azərbaycan heç zaman vəziyyəti öz xeyrinə dəyişdirə bilməz kimi mif dağıldı”, - A.İsazədə bildirib.

Son günlərin hadisələri göstərdi ki, Azərbaycan ordusu döyüş qabiliyyətlidir və dağ şəraitində uğurlu hərbi əməliyyatlar apara bilər, - o əlavə edib.

Cəbhədə son hadisələr 20 ildən artıq müddətdə nəticəsiz fəaliyyət göstərən Minsk Qrupunun nüfuzuna ciddi zərər vurdu. A.İsazadə hesab edir ki, yeni hərbi vəziyyət dinc prosesin sürətləndirilməsi şansını artırır.

“Hərbi əməliyyatlar Azərbaycanın hərbi potensialının 20 il bundan öncəkindən daha güclü olduğunu göstərdi. Rusiyanın neytrallığı şəraitində - bu günlərdə Moskva həqiqətən neytral mövqe tutdu – Azərbaycan öz ərazilərinin güc yolu ilə azad olunması məsələsini tam həll edə bilər. Bu vəziyyət danışıqlar prosesinin canlandırılmasına yardım edir”, - A.İsazadə hesab edir.-06B-