Fərəc Kərimli: Həbsxanadan cəmiyyət çox təhlükəli görünür

Amnistiya ilə azadlığa buraxılmış Müsavat Partiyası başqanının müavini Fərəc Kərimli “Amerikanın Səsi”nə və Turan-a müsahibəsində həbs həyatından danışıb, amnistiyaya  münasibət bildirib.

Fərəc Kərimli və onun bitərəf qardaşı Sirac Kərimli 2014-cü ilin iyulunda narkotik dövriyyəsi ittihamı ilə həbs ediliblər. F.Kərimli 6,5 il, S.Kərimli isə 6 il müddərtinə azadlıqdan məhrumetmə cəzasına məhkum edilib.

S.Kərimli 17 mart 2016-cı ildə əvf olunub.

Sual: Bu gün amnistiya ilə azadlığa buraxılmısınız. Buna münasibətiniz necədir?

Cavab: Azadlıqda olmaq, dostların yanında olmaq xoş bir şeydir. Bununla yanaşı, həbsdə dostlarımız qalıb, adam özünü tam azad hiss edə bilmir. Amnistiyanın icrasını həbsxanada gözlərimlə görmüşəm. Bu amnistiya deyil, alverdir. Deyirlər amnistiyaya düşən 3500 adam azadlığa buraxılıb. O da saxta bir rəqəmdir, heç 3500 ola bilməz. Mənim olduğum cəzaçəkmə müəssisəsində amnistiyaya düşən çox az adam var idi ki, həbs müddətinə bir il qalmışdı, qalanı 2-3 ay qalmışlar idi. Əksəriyyəti də alver yolu ilə, buna amnistiya demək olmaz.

Sual: Saxlandığınız cəzaçəkmə müəssisəsində davranış qaydaları necədir? Siz ekoloji cəhətdən ən ağır şəraiti olan cəzaçəkmə müəssisəsində (14 saylı Cəzaçəkmə Müəssisəsi) saxlanılırdınız.

Cavab: Saxlanma şəraiti çox ağırdır. Həddindən artıq toz var, anti-sanitariyadır. Zonun (cəzaçəkmə  müəssisəsi) ətrafı bütövlükdə daş karxanalarıdır. Amma bizə qarşı, şəxsən özümə qarşı əməkdaşların münasibəti çox normaldır, çox hörmətlə idi, yəni heç bir təzyiq hiss etməmişəm. Əksinə, istər dustaqlar, istərsə də əməkdaşlar tərəfindən hörmətlə yanaşılıb.

Sual: Həbsxanadan cəmiyyət, münasibətlər sistemi necə görünür?

Cavab: Həbsxanaya düşəndən sonra digər siyasi məhbus yoldaşlarımızla söhbət edirdik, cəmiyyət çox təhlükəli görünür. Həbsxanalarda həddindən artıq gənclər var, narkomandır, oğurluqla, soyğunçuluqla tutulub. Baxırsan, demək olar ki, 90 faiz gənclərdir. Ona görə, cəmiyyət heç də yaxşı görünmür.

Sual: Sizə qarşı ittihamı necə qiymətləndirərdiniz?  

Cavab: Mənə qarşı ittiham qondarmadır, hakimiyyətin sifarişi ilə idi. Saxta ittiham kimi, şər-böhtan kimi qiymətləndirirəm.

Sual: Bundan sonra fəaliyyətinizi necə davam etdirəcəksiniz?

Cavab: Bundan sonra Müsavat Partiyasında fəaliyyətimi davam etdirəcəyəm. Əvvəlkindən daha güclü fəaliyyətim olacaq.

Sual: İttihamla bağlı, məhkəmənin hökmü ilə bağlı Avropa Məhkəməsinə müraciət etmisiniz?

Cavab: Bəli, etmişəm. Artıq vəkilim sənədləri göndərib.

Sual: Cəmiyyətə sözünüz varmı?

Cavab: Mübariz olsunlar, bu rejimlə barışmaq olmaz. Azərbaycanda demokratik bir cəmiyyət qurmaq lazımdır. 

Öz növbəsində, Penitensiar Xidmət cəzaçəkmə müəssisələrində saxlanılan bütün şəxslərə qarşı münasibətin qanunvericilik əsasında tənzimləndiyini, amnistiyanın Milli Məclisin qərarına uyğun həyəta keçirildiyini bildirir. Amnistiya zamanı qanunun pozulması halları ilə bağlı isə nə Penitensira Xidmətə  və  nə də digər hüquq-mühafizə orqanlarına hər-hansı şikayət daxil olmayıb. -03-