General Rafiq Ağayev İbad Hüseynovun tərəfdarlarının sözlərini təkzib edib

Terrorçu Monte Melkonyanın məhv edilməsinə İbad Hüseynovun aidiyyatının olmaması ilə bağlı  Müdafiə Nazirliyinin Kəşfiyyat İdarəsinin keçmiş rəisi Talib Məmmədovun bəyanatından sonra İbad Hüseynovun tərəfdarları (831 və 161-ci batalyonların döyüşçüləri) bəyanatla çıxış edərək T.Məmmədovun fikirlərini təkzib ediblər.

Belə ki, onlar bildiriblər ki, İ.Hüseynovun xidmət etdiyi batalyon general Rafiq Ağayevin komandanlığı ilə milli ordunun ikinci korpusuna daxil olub.

İ.Hüseynovun komandanlığı ilə təxribat qrupu düşmənin arxasında əməliyyat keçirdikdən və Melkonyanı məhv etdikdən  (10-13 iyun 1993-cü il) sonra “ermənilərdən götürülmüş qənimət korpus komandirinin stolunun üzərinə qoyulub”, - bəyanatda deyilir.

İ.Hüseynovun tərəfdarları həmçinin bildiriblər ki, Melkonyana qarşı əməliyyat Milli Təhlükəsizlik Nazirliyi tərəfindən hazırlanıb və istiqamətləndirilib və onun aradan götürülməsi ilə bağlı sübutlar (saç, dərisinin bir hissəsi)  indiyədək MTN-də saxlanılır.  

Bununla əlaqədar Turan agentliyi general Rafiq Ağayevə müraciət edərək bu fikirlərə münasibətini bildirməsini xahiş edib. 

“Heç kim mənə heç bir qənimət gətirməyib və mənə tapşırılmış hərbi bölmələr tərəfindən Melkonyanın aradan götürülməsi üzrə əməliyyat keçirilməyib”, - general bildirib.

“Bu, MTN strukturları və ya MTN-in dəstəyilə özünümüdafiə qüvvələri tərəfindən keçirilə bilərdimi?” sualına general mənfi cavab verib.

“Milli təhlükəsizlik naziri Fəxrəddin Təhməzov ilə çox yaxşı və müntəzəm əlaqələrim var idi. Əgər belə bir əməliyyat hazırlansaydı və ya keçirilsəydi, mən bilərdim. Hərbçilərin  dəstəyi olmadan bu cür əməliyyatları düşmənin arxasında keçirmək mümkün deyil”, - general vurğulayıb.

Eyni zamanda o, hansısa özünümüdafiə qruplarının özbaşına  cəbhə xəttini  keçə bilməsini istisna etməyib. 

“Bizim korpusun məsuliyyət zonası Ağdamdan Zəngilana kimi keçirdi. Həmin dövrdə bizə hücum əməliyyatlarının keçirilməməsi, yalnız müdafiə olunmaq əmr edilmişdi. Bizim hücuma keçmək, hətta Martunini götürmək imkanlarımız olsa da, mənə bunu etməmək əmr olunmuşdu. Əsas məsələ Ağdamın müdafiəsi idi, çünki ermənilər şəhərin  blokadaya alınması üzrə əməliyyata başlamışdılar ki, sonradan başqa rayonlara hücuma keçsinlər”, - R.Ağayev qeyd edib. 

Öz növbəsində MTN-in istefada olan polkovniki, həmin dövrdə cəbhəyanı  zonada əməliyyatın iştirakçısı olan Gündüz Şabanov Monte Melkonyanın məhv edilməsi üzrə əməliyyatın keçirilməsi barədə fikirləri təkzib edib. “Bizim tərəfimizdən belə əməliyyat keçirilməyib”, - o qeyd edib.

O həmçinin deyib ki, bu cür miqyaslı terrorçulara qarşı əməliyyatlar “spesnaz” qüvvələri tərəfindən keçirilir. Odur ki, əgər belə bir şey planlaşdırılsaydı bu əməliyyatı yerli özünümüdafiə qüvvələrinə tapşırmazdılar. Eyni zamanda polkovnik qeyd edib ki, müharibə dövründə hərbçilərin icazəsi olmadan və xəbərdarlıq edilmədən yerli özünümüdafiə qüvvələrinin düşmən arxasına keçməsi halları olub və çox güman ki, bu hadisədə də söhbət məhz bundan gedir.

MTN-də adının çəkilməsini istəməyən digər mənbə isə orada Melkonyanın saçının və dərisinin olmadığını bildirib. -02B-