Hikmət Hacızadə: "İstərdim ki, eyni sərbəst seçkilər ölkəmizdə də olsun"

Azərbaycanın Rusiyadakı keçmiş səfiri Hikmət Hacızadə Turan agentlyiinə müsahibəsində Ukraynadakı prezident seçkilərındən danışıb.

Heç bir siyasi təcrübəsi, komandası olmayan şoumen Ukrayna prezidenti oldu. Bu, ölkənin daxili və xarici siyasətinə necə təsir göstərəcək? Bu sualın cavabında H.Hacızadə deyib ki, bunu heç kim qabaqcadan deyə bilməz. Tarixdə belə şeylər olub. Məsələn, Ronald Reyqan. Onu da deyirdilər ki, aktyordur. Amma gəldi, böyük bir prezident oldu.

"Ukrayna artıq diktatura deyil, ölkədə parlament var, müstəqil məhkəmə var. O ölkənin ictimaiyyəti var, üsyan edə bilən, etiraz edə bilən xalqı var. Müstəqil mediası var. Nəhayət, güclü müxalifəti var. Ona görə də bu ölkənin gələcəyi üçün narahat deyiləm", - H.Hacızadə bildirib.

Hakimiyyət dəyişikliyi Rusiya və digər ölkələrlə münasibətlərə necə təsir göstərə bilər? Bu sualın cavabında H.Hacızadə deyib ki, ölkənin xarici siyasətində ciddi dəyişikliklər gözləmir. Zelenski özü də bir şey deməyib, ancaq Rusiya ilə "ümumi dil tapacağını" vəd edib.

"Azərbaycana gəlincə, bizim hər zaman Ukrayna ilə yaxşı münasibətlərimiz olub. Orada xeyli azərbaycanlı yaşayır, burada ukraynalılar yaşayırlar. Ciddi dəyişiklik gözləmirəm", - o deyib.

Vladimir Zelenski MDB dövlətlərinə Ukraynaya baxıb nümunə götürmələrini məsləhət bilib. Ukraynada seçkiqabağı dövrü və seçkinin özünün necə qiymətləndirmək olar? H.Hacızadə bu suala belə cavab verib: "İlk növbədə cənab Zelenskiyə təşəkkür edirəm ki, hamımıza göstərdi ki, mübarizə aparmaq lazımdır. Əlbəttə, biz də istəyərdik ki, belə azad, ədalətli, şəffaf seçki keçirək. Bizdə hələ ki belə ənənə yoxdur. Azərbaycanda azad seçki yalnız bir dəfə 1992-ci ildə olub. Demokratik seçkilər zamanı Əbülfəz Elçibəy qələbə qazandı. İnanıram ki, gün gələcək, bizdə də belə seçkilər olacaq", - Hikmət Hacızadə vurğulayıb. -03B-