Media sistemli böhranda

Bakı/25.01.18/Turan: Azərbaycanın media məkanı sistemli böhrana bürünüb ki, bu da bütün sahələri - iqtisadi, peşəkarlıq, etika, jurnalistlərin təhlükəsizliyi sahələrini əhatə edir. Bu barədə Turan İnformasiya Agentliyinin direktoru Mehman Əliyev Günaz TV peyk və onlayn TV-yə müsahibəsində deyib.

Əgər mətbuatın bütün aspektlərini götürsək vəziyyətin pisləşdiyini müşahidə edirik ki, bunu da pis kimi qiymətləndirmək olar, M.Əliyev vurğulayıb.

Özünütənzimləmə sistemi və SSRİ-nin süqutundan sonra yeni müstəqil mətbuatda yaranmış davamlı inkişaf itirilib.

M.Əliyevin sözlərinə görə, dövlətin KİV-i daim öz nəzarətinə götürmək cəhdləri onun deqradasiyasına gətirib çıxarıb. Dövlət tərəfindən gizli senzura və qorxudan irəli gələn özünüsenzura ciddi yaradıcılıq itkilərinə səbəb olub.

M.Əliyevin sözlərinə görə, yerli televiziya kanallarına əhalinin demək olar ki, 20%-i baxır. Hazırda ictimai rəyə ən çox Türkiyə və Rusiya kanalları, bir qədər də digər dil birlikləri təsir göstərir.

Dövlət və cəmiyyət arasında informasiya əlaqəsi itirilib, rəsmi təbliğatın ictimai rəyə heç bir təsiri yoxdur.

Dövlətin auditoriyanı saxta xəbərlər və digər informasiya məhsulları ilə maraqlandırmaq cəhdləri qəbul edilmir və cəmiyyət öz resurslarını və informasiya qruplarını yaratmağa məcbur olur.

M.Əliyev bu tendensiyanı "xalq jurnalistikası"nın inkişafı adlandırıb. Hakimiyyətin buna qarşı mübarizə aparmaq və ya təqib etmək cəhdləri heç nə vermir.

Həmçinin Rabitə Nazirliyi tərəfindən saytların bloklanması da səmərəsiz addımdır. Son vaxtlar bu, geniş xarakter alıb. Ancaq ən acınacaqlı odur ki, bloklanmanın təşəbbüsçüsü jurnalist ictimai təşkilatı olan Mətbuat Şurasıdır.

Bütün bunlar qanunvericiliyə zidd olaraq edilir. Saytlar qanuni əsas olmadan, məhkəmə qərarı olmadan bağlanır.

M.Əliyev söz azadlığı böhranından çıxmağın yolunu dövlətin KİV-ə qarşı sağlam siyasət yürütməsində görür. Və bunun başında siyasi, iqtisadi və yaradıcılıq azadlığı dayanmalıdır.

KİV-ə qarşı zərərli siyasət yürüdənlər və mətbuatı bu cür kritik vəziyyətə gətirib çıxaranlar layiqli cəzalarını almalıdır, M.Əliyev bildirib.-0-