Mehman Əliyev: Əsas olan hər bir seçicinin hüququ uğrunda ardıcıl mübarizədir

Azərbaycan Demokratik Qüvvələrinin Milli Şurasının (DQMŞ) ictimai əlaqələr komissiyasının rəhbəri, Turan informasiya agentliyinin direktoru Mehman Əliyev Obyektiv.tv-yə müsahibəsində bildirib ki, zərurət olarsa, o, qarşıda duran prezident seçkilərində müxalifətin vahid ehtiyat namizədi yükünü öz üzərinə götürməyə hazırdır.

Onun sözlərinə görə, DQMŞ-nin avqustun 19-da keçirilmiş sonuncu sessiyasında tərəflər vahid namizədin irəli sürülməsi ilə bağlı razılıq əldə edə bilməyiblər. İştirakçıların bir hissəsi hesab edir ki, kinodramaturq və ictimai xadim Rüstəm İbrahimbəyovun sənədlərinin MSK-da qeydiyyatı məsələsi həll olunmasa seçkilərə getməyə dəyməz. Demokratların digər hissəsi isə hesab edir ki, istənilən halda vətəndaş cəmiyyətinin nümayəndəsi olan vahid namizəd lazımdır, belə ki, siyasi partiyalar arasında konsensus yoxdur.

Mehman Əliyevin fikrincə, əsas hər-hansı şəxs deyil, seçicilərin hüquqları və institusional islahatlar uğrunda qələbəyə qədər ardıcıl mübarizəyə yönəlməkdir. “Vaxt azalır və seytnot nəticəsində biz tsuqtsvanq rejiminə keçə bilərik. Bu vəziyyətdə maneələr olarsa, DQMŞ-nin iradəsindən asılı olmadan, müstəqil şəkildə prezident vəzifəsinə namizədliyini irəli sürmək niyyətində olan Müsavat Partiyasının sədri İsa Qəmbəri anlamaq olar”, deyə o bildirib.

Əsas məqam odur ki, sessiyalar zamanı gərgin vəziyyət və mübahisələr, hətta hakimiyyətə yaxın KİV-lərin guya İbrahimbəyovun “Kremlin layihəsi” olması ilə bağlı təxribatları demokratik qüvvələr cərgələrində parçalanmaya səbəb olmadı. Əksinə, Putinin səfəri onun gəlişinin ən çox kimin xeyrinə olduğunu göstərdi. Dövlət başçısı öz siyasi sabitliyi üçün maksimum sayda öhdəlik götürməyə hazır olduğunu bildirdi və Rusiya tərəfə o qədər güzəşt etdi ki, onun niyyətindən şübhə qalmadı.

Müsahibənin sonunda Mehman Əliyev birləşmiş demokratik cəbhənin müvəqqəti varlıq olmadığına, onda təmsil olunan qüvvələrin dəyişiklik və əsaslı siyasi və iqtisadi islahatlar üçün verilmiş tarixi şansa qiymət verdiyinə ümidini ifadə edib.

“Cəmiyyət mənə ehtiyac olduğunu hesab edərsə, onun gələcəyi üçün prezidentliyə namizəd olmağa və demokratiyanın taleyini mənə etibar etmiş hər bir seçicinin hüquqları uğrunda qələbəyə qədər mübarizə aparmağa hazıram”, deyə o, sözlərini tamamlayıb. -17D-