Məmurlar siyasi hüquqlara qarşı dözümsüzdürlər – Rüfət Səfərov (Video)

Bakı/12.09.20/Turan: Azərbaycanda insan hüquqları sahəsində problemlər mövcuddur. Hakimiyyət insan hüquqlarına məhəl qoymur. Orta və iri məmurların xüsusilə siyasi hüquqlara qarşı dözümsüzlüyü var. Bu fikri “Amerikanın Səsi”nin Azərbaycan xidmətinə müsahibəsində “Müdafiə Xətti” hüquq müdafiə təşkilatının icraçı direktoru, keçmiş siyasi məhbus Rüfət Səfərov bildirib.

“Konstitusiyamızda söz və fikir azadlığına, məlumat azadlığına, mətbuat azadlığına, vicdan azadlığına, sərbəst toplaşmaq hüququna kifayət qədər ciddi surətdə yer ayrılıb. Amma faktiki surətdə isə onların hər biri, çox təəssüf ki, kağız üzərində qalıb”.

Səfərovun sözlərinə görə, həbs yerlərində vəziyyət xüsusilə acınacaqlıdır.

“Adamlar siyasi görüş dairəsinə görə həbs olunur. Eyni zamanda saxlandıqları yerlərdə işgəncəyə və qeyri-insani rəftara məruiz qalırlar. Son 6 ay ərzində Azərbaycanın siyasi həyatında yeni repressiv bir səhifə açılıb. Məhz bu repressiv səhifədə adamlar həbs olunur, aclıq edirlər, Fuad Qəhrəmanlının, Seymur Əhmədzadənin və digər siyasi motivlərlə saxlanılan şəxslərin timsalında olmazın işgəncəyə qalırlar.

Təsəvvür edin ki, bunlar azmış kimi onlar müdafiəçilərindən belə imtina etməyə məcbur edilirlər. Biz bunu Fuad bəyin timsalında gördük”, deyə Səfərov sözünə davam edib.

O, son vaxtlar həbsxanalarda aclıq aksiyalarının artmasının təsadüfi olmadığını düşünür.

Onun fikrincə, insanlar ədalətin qanuni yollarla bərpasına olan ümidlərini itirdikdə öz canına qəsd edərək, aclıq aksiyasına gedir. Müxalif siyasətçi Tofiq Yaqublunun aclıq aksiyası bunun parlaq nümunəsidir.

“Tofiq bəyin saxlanıldığı yerdən, hadisə yerinin müayinə protokolundan tutmuş, yekun ittiham hökmünə qədər bütün proses saxtakarlığı ilə, uydurulması ilə fərqlənir. Qurama şahid ifadələri, yalançı ekspert rəylərini əsaslandırıldı, 4 il 3 ay müddətinə Tofiq bəy azadlıqdan məhrum edildi. Tofiq bəy artıq bütün müdafiə mexanizmlərinə, bütün imkanlara istinad edir, amma onun haqqı tanınmır”, deyə Səfərov Yaqublunun keçirdiyi aclıq askiyasına münasibətini bildirib.

Hüquq müdafiəçiləri özləri təzyiqə, təqiblərə məruz qalırlar.

Səfərov bunu özü yaşayıb, bu ilin avqustunda “Müdafiə Xətti” təşkilatının yaradılmasından və “Qarabağ aksiyası” ilə bağlı həbs edilənlərə qarşı işgəncə faktlarını ifşa etdikdən iki gün sonra o, Baş Prokurorluğa çağırılıb və “qanunsuz fəaliyyətə” görə xəbərdarlıq edilib.

Səfərov vəziyyətdən çıxış yolunu bütün cəmiyyətin repressiyalara qarşı mübariəsində, vətəndaşların birləşməsində görür. Yox, əgər biz proseslərə laqeyd və lal nəzərlərlə baxsaq, onda, təbii ki, Azərbaycanda bütün sahələr, o cümlədən də hüquq müdafiə təşkilatı, siyasi partiyaların fəaliyyəti və ümumiyyətlə müxalif fikir düşüncələri üçün şərait olmayacaq”, deyə Səfərli qeyd edib. -16B06-