Demokratik Qüvvələrin Milli Şurası Tofiq Yaqublunun dərhal azad edilməsini tələb edib

Bakı/12.09.20/Turan: Demokratik Qüvvələrin Milli Şurası bu təşkilatın rəhbərlərindən biri olan Tofiq Yaqublunun sağlıq durumu ilə bağlı ciddi narahatlığını və hiddətini ifadə edir. Bu barədə Milli Şuranın bəyanatında deyilir.

Qarabağ müharibəsi qəhrəmanı, vicdan məhbusu, ölkə müxalifətinin aparıcı simalarından biri olan Tofiq Yaqublu saxta ittihamla həbs edilib. Tofiq Yaqubluya qarşı keçirilən məhkəmə prosesi əslində ədalət mühakiməsi adına rəzalət və rüsvayçılıq idi. Saxta məhkəmə prosesində Tofiq Yaqublunun təqsirsiz olduğunu və ona böhtan atanların cinayətini ifşa edən onlarla sübut məhkəmə tərəfindən ümumiyyətlə qiymətləndirilməyib.

ABŞ Dövlət Departamenti, AŞPA, Avropa Komissiyası, Avropa Parlamenti, Böyük Britaniya, Fransa, müxtəlif insan hüquqları təşkilatları səviyyəsində bu uydurma cinayət işi və onun əsasında çıxarılan saxta və əsassız hökm sərt şəkildə qınanılıb, Tofiq Yaqublunun dərhal azad olunması tələb edilib.

Qarabağ qazisi, bütün həyatını Azərbaycan uğrunda mücadiləyə həsr etmiş görkəmli bir şəxsiyyət, siyasətçi, ictimai-siyasi xadim olaraq Tofiq Yaqublunun həbsi Azərbaycan xalqı tərəfindən dərin hiddət və etirazla qarşılanıb.

Tofiq Yaqublu ona qarşı çıxarılan qanunsuz hökmə etiraz əlaməti olaraq 11 gündür ki, aclıq aksiyası keçirir. Onun 59 yaşı, ciddi xroniki xəstəlikləri, nəfəsalma problemi var. Bu şəraitdə Tofiq Yaqublunun 11 gün müddətində aclığı davam etdirməsi onun həyatını itirmək təhlükəsini kifayət qədər real edir.
  Tofiq Yaqublu aclıq aksiyasına ona qarşı dövlət hakimiyyət orqanları tərəfindən mütəşəkkil qaydada törədilən ağır cinayətə etirazın son və əlində olan yeganə vasitəsi kimi müraciət edib və buna görə də qərarında israrlıdır.

Odur ki, sərəncamında olan polis, prokurorluq və məhkəmə orqanları vasitəsilə Tofiq Yaqubluya qarşı törədilən cinayətin nəticələrini aradan qaldırmaq məsuliyyəti bilavasitə Əliyev rejiminin üzərindədir.

"Demokratik Qüvvələrin Milli Şurası olaraq Azərbaycan xalqı və beynəlxalq ictimaiyyətlə birlikdə Tofiq Yaqublunun dərhal azad olunmasını, Bakı Apellyasiya Məhkəməsində Tofiq Yaqubluya qarşı saxta və əsassız hökmdən apellyasiya şikayətinə təcili qaydada və obyektiv baxılaraq ədalətin bərpa olunmasını, Tofiq bəyə bəraət verilməsini, gerçək cinayətkarların qanun qarşısında cəzalandırılmasını tələb edirik", deyə bəyanatda qeyd edilir.  -0-