Ölkədə islahatlardan danışmağa dəyməz – Əli Kərimli

Bakı/04.09.20/Turan: Hakimiyyət Demokratik Qüvvələrin Milli Şurasının (DQMŞ) və Azərbaycan Xalq Cəbhəsi Partiyasının şəxsində müxalifətin tamamilə kənarlaşdırılması planını həyata keçirir. Bu barədə “Amerikanın Səsi” radiosuna müsahibəsində AXCP lideri Əli Kərimli bildirib.

Kərimli DQMŞ üzvü Tofiq Yaqublu ilə bağlı məhkəmə prosesini və onun barəsindəki hökmü, eləcə də 15 iyul “Qarabağ aksiyası”ndan sonra onlarla AXCP fəalının həbsini sifarişli adlandırıb.

Kərimli qeyd edib ki, aprelin 13-də öz mənzilində İnternetdən məhrum edilib, axşam saat 8-dən sonra isə mobil rabitəsi də kəsilib.

Karantin rejimi yumşaldıldıqdan sonra Kərimli evdən çıxa və məhdudiyyətsiz hərəkət edə bilir, amma daim izlənildiyini hiss edir.

Kərimli İnternetdən istifadə imkanının məhdudlaşdırılması ilə əlaqədar məhkəməyə müraciət edib, amma iddiaya baxılmayıb.

O, həmçinin qeyd edib ki, AİHM-nin qərarına baxmayaraq, 15 ildir hakimiyyət ona xarici pasport vermir.

Məhkəmə belə nümayişkaranə şəkildə, açıq-aşkar saxta ittihamla Tofiq Yaqublunu həbs edirsə, nə gözləmək olar? - deyə Kərimli bildirib.

Ölkənin çətin vəziyyətə düşdüyü, Ermənistanın yeni təxribatlarının istisna olmadığı bir vaxtda hakimiyyət cəmiyyəti birləşdirmək yerinə “əcinnə ovu” ilə məşğuldur, Kərimli belə hesab edir.

Digər tərəfdən, institusional müxalifətin kənarlaşdırılması belə hakimiyyəti xalqın etirazlarından qorumayacaq, Belarusdakı hadisələr bunun parlaq nümunəsidir.

Kərimli hakimiyyətin bəyan etdiyi islahatlara inanmır. “Hansı islahat? Görmürüsünüz, ölkədə nə baş verir? Bu günlər onlarala insan günahsız şəkildə, Qarabağ sevdalısı şərlənərək həbs olunur. Tofiq Yaqublu kimi insan yüz minlərin gözünün qabağında şərlənərək həbs olunur. Adamlara işgəncə verilir. Həbs olunmuş cəbhəçilərin çoxu ilə ümumiyyətlə əlaqə yoxdur. Onların yanına vəkil də buraxmırlar”, deyə Kərimli qeyd edib. -06D-