Qarabağ münaqişəsinin həllində sıçrayış üçün siyasi iradə lazımdır - Toyvo Klaar

Bakı/04.06.19/Turan: Bakıya hazırki səfərimin məqsədi Azərbaycan rəhbərliyi ilə görüşlər keçirmək, Qarabağ nizamlanmasının hazırki vəziyyəti, hakimiyyətin və vətəndaş cəmiyyətinin bu məsələ ilə bağlı mövqeyi ilə tanış olmaqdır. Bu barədə Avropa İttifaqının Cənubi Qafqaz və Gürcüstanda böhran üzrə xüsusi nümayəndəsi Toyvo Klaar Turan agentliyinə eksklüziv müsahibəsində bildirib.

"Bildiyiniz kimi, Aİ danışıqların iştirakçısı deyil, amma biz ATƏT-in Minsk Qrupunun səylərini dəstəkləyirik, mənim rolum da bu səyləri dəstəkləməkdən ibarətdir", deyə Klaar bildirib.

"Prezident İlham Əliyev mənə hazırki vəziyyəti necə qiymətləndirdiyi, hansı çağırışların, hansı imkanların olduğu barədə məlumat verib.

Bu ayın sonlarında Yerevana səfər etməyi və müzakirələri Ermənistan rəhbərliyi ilə davam etdirməyi planlaşdırıram", deyə Aİ-nin xüsusi nümayəndəsi sözünə davam edib.

Əliyevlə görüşdə tərəflərin bir müddət əvvəl elan etdiyi humanitar addımların həyata keçirilməsi məsələsi müzakirə olunub? Bu suala cavabda Toyvo Klaar deyib ki, bu mövzuya toxunulub. "Biz etimad və qarşılıqlı anlaşma tədbirlərini müzakirə etdik. Ümid edirəm ki, Bakıda və Yerevanda bu prosesin əhəmiyyətini dərk edirlər və mən prezidentdən və XİN başçısından Avropa İttifaqının bu prosesə necə yardım edə biləcəyini söyləmələrini xahiş etdim", deyə Klaar bildirib.

Avropa İttifaqı sülh prosesini necə dəstəkləyə bilərdi? Bu suala cavabda Brüssel nümayəndəsi deyib ki, Aİ uzun illərdir vətəndaş cəmiyyətinə dəstək, əhalinin sülhə hazırlanması layihələrinə vəsait ayırır.

Sirr deyil ki, Bakıda Ermənistan və Azərbaycan vətəndaş cəmiyyəti nümayəndələri səviyyəsində əlaqələri yaxşı qarşılamırlar. Bu halda Aİ necə bu istiqamətdə layihələr həyata keçirə bilər? Bu suala cavabda Klaar deyib ki, Aİ-nin iki layihəsi var və onlardan biri - Ermənistan və Azərbaycan vətəndaş cəmiyyəti nümayəndələrinin görüşü bu yaxınlarda Tbilisidə keçirilib.

Hamı başa düşür ki, ünsiyyət, əlaqə olmadan və bir-birini başa düşmədən sülh yolu ilə nizamlama mümkün deyil. Məhz buna görə ölkə liderləri bunun nə dərəcədə əhəmiyyətli olduğunu başa düşməlidirlər. "Azərbaycan rəhbərliyi ilə bugünki görüşlərdən sonra məndə belə bir təəssürat yaranıb ki, bu cür anlaşma var", deyə Klaar bildirib.

Ermənistanda hakimiyyətin dəyişməsindən sonra münaqişənin sülh yolu ilə həlli şansı artıb? Bu suala cavabda Aİ-nin xüsusi nümayəndəsi deyib ki, Ermənistanın yeni hökuməti "açıq şəkildə" sülh yolu ilə nizamlamaya və konstruktiv dialoqa sadiqdir. "Ermənistanın XİN başçısı və digər liderləri ilə bir sıra rəsmi və qeyri-rəsmi görüşlərin bizə bağışladığı təsir belədir", deyə Klaar bildirib.

Hamı konstruktiv əhval-ruhiyyədədirsə, 30 ildir niyə nizamlamada irəliləyiş yoxdur? Sıçrayış olması üçün nə lazımdır? Bu suallara cavabda Aİ nümayəndəsi deyib ki, istənilən münaqişə üçün həll tapmaq olar. "Sıçrayış olması üçün tərəflər siyasi iradə nümayiş etdirməlidir. Bu, elə bir şeydir ki, onlara kənardan verilə bilməz", deyə diplomat bildirib.-02B-