Rasim Musabəyov: Bu, heç də ikitərəfli münasibətə xoş nəticə gətirən qərar olmayacaq

Millət vəkili Rasim Musabəyovun Turan-a müsahibəsini təqdim edirik.

Sual: Ədliyyə Nazirliyi Ümumrusiya Azərbaycan Konqresinin ləğv edilməsi üçün Ali Məhkəməyə müraciət edib. Bunun səbəblərini nə ilə izah etmək olar?

Cavab: Çətinlik çəkirəm. Bu sualı  birinci növbədə həmin Ədliyyə Nazirliyinə yönəltmək lazımdır. Bəhanələr var. İndi, ola bilsin ki, Rusiya qanunvericiliyində müəyyən dəyişikliklər olub. Dəyişikliklərə uyğun olaraq təşkilatın nizamnaməsinə dəqiqləşdirmələr aparılmalıdır. Edilib, ya  etməyiblər, mən buna dəqiq cavab verə bilmərəm. Ancaq, hər bir halda, bu, heç də xoş münasibətin təzahürü deyil. Əsas odur ki, düşünürəm ki, Rusiyada da anlayırlar ki, siyasətdə qarşılıqlı prinsipi heç kəs ləğv etməyib. Yəni kimlərsə bəhanə edir ki, bizim o təşkilat səfirliklə sıx əlaqədə çalışır, Rusiyanın da Azərbaycandakı icması da Rusiya səfirliyi ilə kifayət qədər sıx fəaliyyət göstərir. Və biz bunu qəbahət hesab etmirik. Hər bir halda, bu, baş verərsə də, Ümumrusiya Azərbaycan Konqresi qəti ləğv olunsa, fərz edirəm ki, bunun ikitərəfli münasibətə mənfi təsiri olacaq. Ancaq əslində təşkilatın fəaliyyətinin qarşısını almaq iqtidarında deyillər. Ona görə ki, indiki rəsmi  qeydiyyatı olmayacaq, Azərbaycan təşkilatlarının bir koordinasiya şurası adı ilə öz fəaliyyətini davam etdirəcək.

Sual: Azərbaycanın Diasporlarla İş Üzrə Dövlət Komitəsi Ümumrusiya Azərbaycan Konqresinin Rusiya qanunvericiliyinə uyğun fəaliyyət göstərdiyini bildirir və onun fəaliyyətinin ikitərəfli münasibətlərin inkişafına, millətlərarası münasibətlərin inkişafına təkan verdiyini bildirir. Belə bir halda bunun ləğvinin siyasi tərəfləri ola bilərmi?

Cavab: Təkrar edirəm, məhkəmədə bəlli olacaq, doğurdan da əsaslıdır, yoxsa yox. O iradları aradan götürmək üçün tərəflərin, belə deyək, xoş niyyətləri olduğu halda məsələ öz qanuni həllini tapa bilər. Əks halda sadəcə olaraq Rusiyanın FSB-si (Təhlükəsizlik İdarəsi) bizim təşkilatı yola verə bilmir və ona görə onu ləğv etmək istəyirsə, təkrar edirəm, bu, heç də ikitərəfli münasibətə xoş nəticə gətirən qərar olmayacaq.

Sual: Ədliyyə Nazirliyinin Ali Məhkəməyə belə bir müraciətinin indiki vaxta təsadüf etməsi nə ilə bağlı ola bilər?

Cavab: Bunu mən bilmirəm. Bunu  Diaspordan öyrənmək lazımdır. Elə bil ki, onların sözlərinə görə, onlar bir neçə dəfə  bizim o təşkilata iradlarını bildiriblər. Ancaq o iradlar aradan qaldırılmayıb. Belədir, belə deyil, onu təşkilatdan soruşmaq lazımdır.

Sual: Həmin Konqres Azərbaycanın keçmiş prezidenti Heydər Əliyev və Rusiyanın indiki prezidenti Vladimir Putinin təşəbbüsü ilə yaradılıb. Belə halda siyasi münasibətlərdə gərginlik  halının olması ortaya çıxmırmı?

Cavab: Belə bir ümumi baxış göstərmir ki, gərginlik var. Ancaq, təkrar edirəm, Rusiya çalışır indi bütün əhatəsində olan təşkilatlatları tam özünə, inzibati orqanlara  tabe etsin. Ola bilsin ki, bizim təşkilatı  onlar istədikləri dərəcədə özlərinə tabe edə bilmirlər. Rusiyanın da orada əldəqayırma  təşkilatı var, Rusiya-Azərbaycan mədəni muxtariyyət adlı. İstisna etmirəm ki, öz təşkilatları üçün daha geniş meydan açmaq istəyirlər və özünün tam nəzarətində olmayan Ümumrusiya Azərbaycan Konqresinin işinə məhdudiyyət yaradıblar.

Sual:  Rusiyanın da Azərbaycanda diaspor təşkilatları, o cümlədən bir neçə Universitet filalı fəaliyyət göstərir. Azərbaycanda çoxsaylı rusdilli məktəblər var. Bu münasibətlər sistemində belə hərəkətlər Azərbaycanda da rus icması üçün problemlər yaratmasına şərait yarada bilərmi?

Cavab: Çox yanlış olardı. Biz o məktəbləri, universitetləri Rusiyanın xoşuna gəlmək üçün açmamışıq. Bu, birinci növbədə öz maraqlarımıza cavab verir. Ancaq, o ki qaldı icmaya, Rusiya icmasına doğma bir təşkilat kimi yanaşırıq. Düşünmürəm ki, indi Rusiya hansısa bir yaramaz addım atdığı halda biz bilavasitə götürüb rus icması üçün çətinliklər yaradaq. İcmanın rəhbəri Azərbaycan parlamentinin üzvüdür. Əmin deyiləm ki, belə bir yanaşma qaldığı halda gələn seçkilərdə icmanın rəhbəri parlamentə deputat seçiləcək və o icmanı indi bu gün yüksək səviyyədə dəstəyi, komunikasiyası varsa, adekvat şəkildə fərz edirəm ki, o yanaşmanın da, belə deyək, birliyi aşağı düşəcək. Ancaq heç də onun tərəfdarı deyiləm ki, durub kimsə Rusiyada Azərbaycan təşkilatına qarşı düzgün olmayan münasibət göstərir, biz də, tutaq ki, rus icmasına hansısa məhdudiyyət yaradaq. -03/16D-