R.Daşdəmirli: Oğlumu mənə görə həbs ediblər

AXCP Təşkilat Komitəsinin sədri Rafiq Daşdəmirli oğlunun həbsinə onun siyasi fəaliyyətinin səbəb olduğunu düşünür. Bu barədə o, Turan agentliyinə müsahibəsində bildirib.

Daşdəmirliyinin sözlərinə görə, Sənan noyabrın 17-də həbs edilib. “Bundan əvvəl mənə dəfələrlə xəbərdarlıq ediblər, Milli Şuranın aksiyalarının təşkilindən geri çəkilməyimi istəyiblər.

Mən oktyabrda və noyabrda mitinqlərin texniki və təşkilati hazırlığı üzrə bütün işləri görürdüm. Sonuncu dəfə noyabr mitinqində xəbərdarlıq aldım. Xüsusən, məndən həmkarlarımla yazışmalarım olan facebook profilimin parolunu istəyiblər. Mən imtina etdikdən sonra oğlumu həbs etdilər”, deyən Daşdəmirli məhz kimin hədələdiyini və xəbərdarlıq etdiyini açıqlamayıb.

Onun sözlərinə görə, oğlunu axşam evin həyətində narkotik saxlamaq ittihamı ilə həbs ediblər.

“Oğlum İqtisad Universitetini qırmızı diplomla bitirib. Ona qarşı irəli sürülmüş ittihamlar yalandır”, deyə Daşdəmirli bildirib.

“Vəkil oğlumla görüşür, o, özünü yaxşı hiss edir və mənə görə həbs edildiyini başa düşür, baxmayaraq ki, özü siyasətdən uzaqdır”, deyə Daşdəmirli qeyd edib.

O, heç nəyə baxmayaraq siyasi fəaliyyətini davam etdirəcəyini vurğulayıb.

“Oğlumun həbsi ailəmizə ağır zərbə oldu. Amma biz səbr etməliyik. Ailəmiz həbsin səbəbini yaxşı başa düşür”, deyə Rafiq Daşdəmirli bildirib. -03/04D-