Türk ocakları İstanbul təşkilatının sədri: “Azərbaycandakı milli şüurun çox yüksək olduğunu görürəm”

Turan: Türk ocaklarının qurucularından biri olan Əhməd Ağaoğlunun anadan olmasının 150 illiyini Bakıdan sonra İstanbulda 2 günlük beynəlxalq simpoziumla qeyd etdiniz.Yaxın günlərdə Əhməd Cəfəroğlunun 120 və Səməd Ağaoğlunun 110 illiyini simpoziumlarla qeyd edəcəksiniz.Deyəsən,bu ilki fəaliyyətinizdə Azərbaycan çox mühüm yer tutdu...

Bayram: Əhməd Ağaoğlunun 150 illiyinə həsr etdiyimiz simpozumların uğurlu keçdiyinə inanıram.Gələn ay  Əhməd Cəfəroğlunun anadan olmasının 120 illiyinə həsr edilmiş simpozium keçirəcəyik.Simpoziumumuz daha sonra Bakıda və Gəncədə davam edəcək.Eyni zamanda,Əhməd Cəfəroğlu ilə bağlı xatirə kitabını da çapa hazırlamışıq.Əvvəlki illərdə Əlibəy Hüseynzadə,Əhməd Cavad,Hüseyn Cavid və başqa mühüm şəxsiyyətlərlə bağlı beynəlxalq tədbirlər keçirmişik.Türk dünyasının digər mühüm adamlarının yubileylərində iclaslar təşkil etmək bizim fəaliyyətimizin əsas istiqamətini təşkil edir.Çünki bu coğrafiyadakı Türk dövləti,yəni Türkiyə Cümhuriyyəti təkcə bu sərhədlər daxilində anadan olan insanların qurduğu bir dövlət deyil.Bu sərhədlərin uzağından gələn Türk mənşəli insanların Cümhuriyyətimizin qurulmasında  böyük zəhməti olub.Hüseynzadə,Ağaoğlu,Akçura və b. mühüm şəxsiyyətlərin  Türklük və Cümhuriyyət ideyalarının gündəmə gətirilməsi və praktik şəkildə həyata keçirilməsində ən azı bu coğrafiyanın insanları qədər  rolları olub.Onları xatırlamaq,bu günün gəncliyinə tanıtmaq və irslərini gələcək nəsillərə  ötürmək bizim işimizin əsasını təşkil edir.Biz bu minvalla Türk dünyasının daha asan qaynayıb-qarışmasına nail olmağa çalışırıq.Gələn ilin əvvəlində mini-Türk sammiti keçirəcəyik.Əlbəttə,Türk dövlət başçılarının iştirakı ilə hər il keçirilən sammitlər vardır,onlar rəsmi-siyasi işlərdir.Təbii olaraq,orada bəzi məsələlər məhdud şəkildə müzakirə edilir.Biz isə mülki bir platforma kimi hər şeyi qeyri-məhdud şəkildə müzakirə etmək istəyirik.1912-ci  ildə yaradılan Türk ocakları təşkilatının əsas məqsədi millətimizdə yeni bir oyanışa nail olmaq idi,eyni zamanda,qurduğumuz yeni dövlətin ideoloji təməlində təşkilatımızın həlledici rolu olmuşdur.Türkiyə Cümhuriyyəti elan ediləndən sonra Türk dünyasının bir hissəsi əsarət altında olduğuna görə,aktiv  fəaliyyət göstərmyimiz mümkün deyildi.İndi müstəqil  dövlətlər var,gediş-gəlişlər asanlaşıb.Biz Türk dünyasının gəncləriylə daha sıx dialoq yaratmaq istəyirik.

Turan: Konfranslarınızda gördüyünüz işlərin əsas məqsədinin milli şüuru alovlandırmaq olduğunu xüsusi qeyd edirsiniz.Azərbaycanla birgə keçirdiyiniz iclaslara  gəncliyin münasibəti sizi qane edir?

Bayram: Mən Azərbaycandakı milli şüurun çox yüksək olduğunu  görürəm.Məncə,müstəqilliyin əldə edilməsinin  gətirdiyi həyəcan,Qarabağ kimi böyük bir milli məsələ bunda təsirli ola bilər.Azərbaycandakı milli şüurun və həyəcanın bizim iclaslarımız vasitəsiylə  Türkiyəyə də sirayət etməsi lazımdır.Biz Türkiyə Cümhuriyyətinin 100-cü ilinə doğru gedirik,sanki cəmiyyətimizdə bir rahatlığın olduğunu,şəxsi mənafelərin ön plana çıxdığını görürük.Bunu aradan qaldırmağın yolu Türk dünyası ilə əlaqələri gücləndirməkdən keçir.Mən böyük kütlələrin bu məsələlər barədə bizim kimi düşünməsini gözləmirəm.Əsas  vəzifə gənclərin  üstünə düşür,ona görə biz onların milli şüurda yetişmələrinə böyük əhəmiyyət veririk.Türkiyənin həyata keçirdiyi “Sülh bulağı” əməliyyatına verilən reaksiyalar göstərdi ki,bizim özümüzdən başqa heç kimimiz yoxdur.Ən güclü dəstəyi Azərbaycan verdi.Bunu inkişaf etdirməyimiz lazımdır.

Turan: 2020-ci ilin ilk yarısında hansı tədbirləriniz olacaq?

Bayram: İlin ilk yarısında Nuri Paşanın anadan olmasının 130 illiyini qeyd edəcəyik,bununla bağlı  Azərbaycanla müştərək simpozium keçirməyi  planlaşdırırıq.Nuri Paşa bizim üçün çox mühüm adamdır.O,ilk müstəqil Türk Cümhuriyyəti olan Azərbaycanın öz müstəqilliyini qorumasında önəmli işlər görən komandandır.Azərbaycan da Türkiyə də öz müstəqilliklərini qazanmalarını  bir-birlərinə borcludurlar.Mən Azərbaycana daha çox önəm verirəm.Çünki Türkiyə ilə Türk dünyası arasında körpü vəzifəsini yerinə yetirə bilər.Azərbaycanda Türk ocakları təşkilatımızı açdıq,bu,bizim üçün son dərəcə mühüm və sevindirici işdir.Bu baxımdan Azərbaycan ziyalılarından çox şey gözləyirik.

Turan: Azərbaycana xüsusi müraciətiniz varsa,bizim vasitəmizlə edə bilərsiniz...

Bayram: Gördüyümüz işlərə Azərbaycanın daha çox maddi və mənəvi dəstək verməsini  istəyirəm.Həm hamıdan yaxınıq həm müştərək cəhətlərimiz çoxdur həm də Azərbaycandan o biri tərəflərə getmək daha asandır.