Yüksək cərimə müxalifətçiləri dayandırmayacaq

Cərimələrin dəfələrlə yüksəldilməsi belə fəal müxalifətçiləri dayandırmayacaq, bu barədə AXCP gənclər komitəsinin sədri Əbülfəz Qurbanlı və "Azad gənclik" ictimai təşkilatının sədri Ülvi Həsənli obyektiv.tv-yə müsahibələrində bildiriblər.

Legitim olmayan parlamentin buraxılması tələbi ilə keçirilən 20 oktyabr mitinqində iştiraka görə həbs edilən (7 və 8 günlük) liderlərin sözlərinə görə, o gün polis 100-dən çox insanı həbs edib, onların 13 nəfəri inzibati cəza alıb.

Fəallar sərbəst toplaşmaq və ifadə azadlığı hüquqları pozulduğunu hesab edirlər və onları həbs edən hakimin əməllərindən apellyasiya şikayəti veriblər.

Keçmiş deputat Gülər Əhmədova və keçmiş rektor Elşad Abdullayevin videoçarxda deputat kürsüsü üçün açıq-aşkar hərrac aparmasına baxmayaraq, hakimiyyət bu biabırçı hadisəyə hüquqi qiymət verməyə tələsmir. Buna görə də, ictimaiyyət meydanlara çıxıb bu siyasi rüsvayçılığa son qoyulmasını tələb etmək haqqına malikdir, deyə gənc fəallar bildiriblər. 

Parlamentin cərimələrin sərtləşdirilməsi üzrə qanunverici tədbirlər qəbul etməsi vəziyyətdən çıxış yolu deyil. Diktaturalar həmişə qeyri-adekvat addımlar atır, lakin bu, kömək etmir, əksinə, hakimiyyətin vəziyyətini daha da pisləşdirir, deyə Qurbanlı qeyd edib.

O, müxalif gənclərin noyabrın 2-də Milli Məclisin binası qarşısında keçiriləcək mitinqdə iştirak etməkdə qətiyyətli olduqlarını bildirib.

Onun sözlərinə görə, yüz minlərlə işsiz, həyatda perspektivləri olmayan gəncin itiriləcək heç nəyi yoxdur. "Ən yaxşı halda qəpik-quruşa günlük iş tapmaq olur. Buna görə məhkəmələr etiraz edənlərdən alacaq heç nə tapmayacaq", deyə Qurbanlı bildirib.

Qeyd edək ki, qanunvericiliyə təklif olunan düzəlişlərə görə, icazəsiz mitinqdə iştiraka görə cərimələr 100-200 dəfə artaraq, 1500-3000 manata çatacaq.

Parlament komitəsi artıq bu düzəlişləri təsdiq edərək, baxılması üçün parlamentə göndərib. -17D-