Azərbaycanda məktəbli geyimləri çatışmır, valideynlər narazılıq edirlər

Bakı/14.09.22/Turan: Sentyabrın 13-də bir qrup ana məktəbli geyimlərinin çatışmaması, istehsalın müxtəlif ölçülərdə az olması, uyğunsuzluğu, keyfiyyətinin aşağı olması ilə bağlı narazılıqlarını bildirib. 

Belə ki, ümumi təhsil məktəblərində yeni tədris ilinin başlaması ilə əlaqədar valideynlər məktəbli geyimləri almaq üçün Bakı Tikiş Evinə üz tutur. Çünki məktəbli geyimlərinin istehsalı ilə yalnız Bakı Tikiş Evi (BTE) məşğul olur.

Azərbaycanda yeni tədris ilinin sentyabrın 15-də başlamasına baxmayaraq, ölkədə şagirdlərin böyük hissəsi hələ də məktəbli geyimləri əldə edə bilməyib. Bu səbəbdən valideynlər Bakı Tikiş Evinin qarşısına toplaşaraq şagird geyimləri tələb edirlər.

Sentyabrın 13-də Turan-ın xüsusi müxbiri Bakı Tikiş Evinə gedərək problemi öyrənməyə çalışıb. Bu zaman tikiş evinin qarşısına toplaşan bir qrup qadın geyimlərin övladlarının ölçülərinə uyğun gəlməməsindən, keyfiyyətinin aşağı olmasından, qiymətlərinin yüksək olmasından şikayət ediblər.

Bu zaman Bakı Tikiş Evinin (BTE) satış şöbəsinin müdiri Etibar Əzimov bildirib ki, hər gün təxminən 1500 ədəd məktəbli forması istehsal edilərək satışa buraxılır.

“Bu saydan artıq istehsala müəssisəmizin gücü çatmır. Çünki biz özəl müəssisəyik və kreditlə işləyirik. Bu səbəbdən tək bizim müəssisə məktəblərinin tələbini qarşılaya bilməz”, deyə o qeyd edib.

Onun sözlərinə görə, oğlanlar üçün olan polo köynək 14, şalvar 25, jaket 27 manat, qızlar üçün polo köynək 14, şalvar 25, jaket 27, ətək 25 manatdır.

Bakı Tikiş Evində məktəbli formaları avqustun 17-dən satışa çıxarılıb.  

Bu il martın 17-də Baş Nazir Əli Əsədov “Dövlət ümumi təhsil müəssisəsi təhsil alanlarının geyim formalarının təsvirləri”nin təsdiq edilməsi haqqında qərar imzalayıb.

Qərarda məktəblər üçün nəzərdə tutulmuş 4 rəngdə (tünd-göy, tünd-boz, qəhvəyi-yaşıl (xaki), açıq-qəhvəyi) geyim formasının nümunəsi təklif olunub.  

Xatırladaq ki, Azərbaycanın ümumi təhsil məktəblərində bir milyon beş yüz mindən çox şagird təhsil alır. 0