14 iyul hadisələri ilə ittiham olunanlar özlərini günahkar hesab etmirlər

Bakı/18.05.21/Turan: Mayın 18-də Azərbaycan Ordusuna dəstək məqsədi ilə 2020-ci il iyulun 14-də keçirilən aksiya zamanı baş verən hadisələrlə bağlı həbs edilən şəxslərin cinayət işi üzrə təqsirləndirilən 12 nəfərin məhkəmə prosesi 1 zərərçəkmişin və 2 şahidin ifadələrlə davam etdirilib.

Hakim Ülviyyə Şükürovanın sədrliyi ilə keçirilən prosesdə zərərçəkmiş kimi tanınan Daxili İşlər Nazirliyinin Maddi-texniki Təminat İdarəsinin rəis müavini Ağayev Samir bildirdi ki, hadisə zamanı 20-dən çox polis avtomobillərinə ziyan dəyib, onlardan ikisini təmir etmək mümkün olmayıb və ümumi dəyən ziyanın məbləğini təxminən 55 min manat məbləğində olduğunu deyib. Zərərçəkmiş qeyd edib ki, maddi ziyanın məbləği ilə bağlı rəyini Fiat şirkətindən dəvət olunmuş mütəxəssislər verdi. O, əlavə edib ki, hazırda onun təqsirləndirilən şəxslərə iddiası olmadığını, lakin məhkəmə hadisəni törədən şəxsləri müəyyənləşdirəndən sonra həmin şəxslərə qarşı mülki qaydada məhkəməyə müraciət olunacaq.

Xətai Rayon Polis İdarəsinin əməkdaşı Babayev Səxavət ifadələrində qeyd edib ki, hadisə günü onlara həyacan siqnalı gəlib və onlar Milli Məclisin önünə gəlib. Onun sözlərinə görə, ona daş atılıb, lakin kim tərəfindən atıldığını görməyib.

Digər polis işçisi Baxşəli Bəhram da oxşar ifadələri verib, lakin ifadələrində "normal insan həmin vaxtı küçədə ola bilməz" ifadəsini işlətdi. Bu da təqsirləndirilən şəxslərin narazılığına səbəb olub. Onlar etiraz edərək bildirib ki, onlar dövlətə, vətənə, şəhidlərə görə meydana gəliblər, təxribat törətməyə gəlməyiblər, amma onlara və orada olan insanlara anormal deyilir.

Növbəti məhkəmə prosesi mayın 25-ə təyin edilib. –0—