Qız ölümündə ittiham olunan işgəncə altında etiraf etdiyini söylədi

Bakı/18.05.21/Turan: "Mən ifadələrimi işgəncə altında vermişəm, günahsızam". 

Bunu dünən, mayın 17-də Gəncə Ağır Cinayətlər Məhkəməsində keçirilən məhkəmə hazırlıq iclasında 10 yaşlı Nərmin Quliyevanın öldürülməsində ittiham olunan İlkin Süleymanov deyib.

Hakim Dadaş İmanovun sədrliyi ilə keçirilən iclasda müdafiə tərəfi bir neçə vəsatətlə çıxış etdi. Vəkillər iş üzrə keçirilən ekspertizaların təkrar keçirilməsini, işə xitam verilməsini və İlkin Süleymanovun ilkin ifadələrini indiki ifadələrlə əvəz edilməsini məhkəmədən xahiş ediblər. "Biz həmçinin İlkin Süleymanovu tibbi ekspertizadan keçirilməsini istəyirik. Onun bədənində xəsarət izləri qalıb, ağrıları var. Həmçinin işgəncələri sübut edən fotoşəkillər var. Xahiş edirik ekspertizanın keçirilməsini təmin edəsiniz". Lakin məhkəmə heç bir vəsatəti təmin etmədi.

Daha sonra hakim Dadaş İmanov müdafiə tərəfə bütün vəsatətləri təqdim etməyə təklif etdi. Bu da vəkillərin etirazına səbəb oldu. Vəkil Əlibaba Rzayev hakimdən verilən vəsatətlərə münasibət bildirməyə xahiş etdi. "Möhtərəm hakim, biz işə xitam verilməsini istəyirik. Vəsatətimiz təmin olunmasa biz digər vəsstətlərimizi da verəcəyik". Hakim isə bununla razılaşmayıb. Bu isə vəkillər hakimə etiraz verməsinə səbəb olub. Lakin hakim Dadaş İmanov etiraz ərizəsini qəbul etməyib və prosesi davam etdirib.

Dövlət ittihamçısı İlkin Süleymanovun bu iş üzrə təqsirli olduğu barədə kifayət qədər sübut, o cümlədən etiraf ifadələrin olmasını deyərək məhkəmə baxışın təyin edilməsini xahiş etdi. 

İlkin Süleymanov isə buna etiraz etdi. "Mənim bu ifadələrimi işgəncə altında alıblar. Mənim bu işlə heç bir əlaqəm yoxdur. Mənə polisdə deyiblər ki, sənin ananı, bacını gətirib burada döyəcəyik deyə mən bu təhdidlərin və mənə verilən işgəncələrin altında bu ifadəyə qol çəkmişəm".

Hakimlər isə işi icraata götürərək məhkəmə baxışını iyunun 1-ə təyin edib.

Xatırlatma 

10-yaşlı Nərmin Quliyeva 2019-cu ilin noyabrın 21-də yaşadığı Dondar Quşçu kəndində itkin düşüb. Yanvarın 6-da kənddə onun yandırılmış meyiti tapılıb.

Yanvarın 10-da isə Daxili İşlər Nazirliyi və Baş Prokurorluq birgə məlumat yayaraq Nərmin Quliyevanın qətlində şübhəli bilinən 47-yaşlı İlkin Süleymanovun saxlandığını, onun ilkin ifadəsində cinayəti etiraf etdiyini açıqlayıb.

İlkin Süleymanova qarşı Cinayət Məcəlləsinin (CM) 120.2.9 (təqsirkar şəxs üçün aşkar surətdə köməksiz adamı öldürmə) və 145.2.3 (yetkinlik yaşına çatmayan şəxsi qanunsuz azadlıqdan məhrum etmə) maddələri ilə ittiham irəli sürülüb. CM-in 145.2.3 maddəsində 3 ildən 5 ilədək, 120.2.9 maddəsində isə 14 ildən 20 ilədək və ya ömürlük həbs cəzası nəzərdə tutulub.

İlkin Süleymanovun vəkilləri onun 4 gün polis şöbəsində qanunsuz saxlanması və işgəncəyə məruz qalması barədə söylədiklərilə əlaqədar Baş Prokurorluğa şikayət edib, buna görə məsuliyyət daşıyan vəzifəli şəxslərin cinayət məsuliyyətinə cəlb olunmasını istəyib.

Amma Baş prokurorun sabiq birinci müavini Rüstəm Usubov belə nəticəyə gəlib ki, şikayət əsassızdır, ona görə də cinayət işi başlanmasının rədd olunması haqda qərar imzalayıb.-0-