16 mərtəbəli yaşayış binasında baş vermiş yanğın üzrə məhkəmə başlayır

  2015-ci il mayın 19-da Binəqədi rayonundakı 16 mərtəbəli yaşayış binasında baş vermiş yanğına dair istintaq materialları məhkəməyə göndərilib. Bu barədə Baş Prokurorluğun məlumatında deyilir.

Binaların üzlənməsində istifadə olunan poliuretan məmulatını istehsal edən "Qlobal Stone" MMC-nin baş direktoru Uğur Bəşirov, "Global Construction" MMC-nin təsisçisi və İdarə Heyətinin sədri Miryusif Mahmudov, həmin cəmiyyətin İdarə Heyətinin sədr müavini Ələkpər Əsgərov, Binəqədi Rayon İcra Hakimiyyəti başçısının sabiq birinci müavini Qəzənfər Novruzov, İcra Hakimiyyətinin təsərrüfat şöbəsinin müdiri Ədalət Rəcəbov, Binəqədi rayonu, 72 saylı Mənzil Kommunal İstismar Sahəsinin rəisi Nizami Orucov məsuliyyətə cəlb olunublar.

Onlar Cinayət Məcəlləsinin 225.2 (yanğın təhlükəsizliyi qaydalarını pozma ehtiyatsızlıqdan zərərçəkmiş şəxsin ölümünə və digər ağır nəticələrə səbəb olduqda) və 308.2-ci (vəzifə səlahiyyətlərindən sui-istifadə ağır nəticələrə səbəb olduqda) maddələri ilə ittiham olunublar.

Bundan əlavə, poliuretan məmulatlarının sınaq yoxlamalarını keçirən "Dərnəgül Boru Zavodu" Qapalı Səhmdar Cəmiyyətinin sınaq laboratoriyasının müdiri Ağacavad Məmmədov CM-in 308.2 və 313-cü (vəzifə saxtakarlığı) maddələri, poliuretan məmulatlarına dair texniki şərtləri razılaşdırmış Səhiyyə Nazirliyinin Gigiyena və Epidemiologiya Mərkəzinin baş direktoru Akif Əlibəyov CM-in 308.2-ci maddəsi ilə ittiham olunublar.

İstintaq materialları Bakı Ağır Cinayətlər Məhkəməsinə göndərilib.

* Xatırladaq ki, yanğın zamanı 16 nəfər həlak olub. Onların arasında uşaqlar da var. Bu, üçüncü belə hadisədir. Yalnız bu faciədən sonra hakimiyyət Bakıdakı yüzlərlə binadan poliuretanın sökülməsinə başlayıb.-02D-