2023-cü ildə 6343 kq narkotik vasitə qanunsuz dövriyyədən çıxarılıb

Dövlət Statistika Komitəsinin DİN-in məlumatlarına əsaslanan açıqlamasına görə, 2023-cü ildə narkotik maddələrin qanunsuz dövriyyəsi ilə bağlı 10 057 (27,3%) cinayət işi açılıb, bu da 2022-ci illə müqayisədə 5,7% azdır. Narkotik vasitələrin 65,3%-i satış məqsədi olmadan ölkəyə gətirilib.

Hesabat dövründə narkotik vasitələrin və psixotrop maddələrin qanunsuz dövriyyəsi ilə əlaqədar cinayət törədən 8697 şəxs müəyyən edilib. Onların 35,6 faizini əvvəllər də cinayət məsuliyyətinə cəlb olunan şəxslər təşkil edib ki, bu da ötən ilin müvafiq dövrü ilə müqayisədə 5,0 faiz çoxdur. Cinayət törətmiş şəxslərin 98,1 faizi cinayət məsuliyyətinə cəlb olunublar.

Narkotiklə bağlı cinayətləri törədənlərin 70,6 faizini heç yerdə işləməyən və oxumayanlar,  2,8 faizini qadınlar, 0,2 faizini 14-17 yaşda olan uşaqlar, 6,0 faizini 18-24 yaşlı, 15,9 faizini 25-29 yaşlı gənclər, 77,9 faizini isə 30 və yuxarı yaşlı şəxslər təşkil edib.

Ötən il ərzində 6343,4 kq narkotik vasitə və psixotrop maddə müsadirə edilib, bu da 2022-ci illə müqayisədə 26% çoxdur.

Qanunsuz dövriyyədən çıxarılmış narkotik vasitələrin və psixotrop maddələrin 3823,7 kiloqramını marixuana, 1939,3 kiloqramını heroin, 261,2 kiloqramını tiryək, 65,2 kiloqramını həşiş, həşiş yağı və qətranı, 0,5 kiloqramını kokain, 253,5 kiloqramını isə digər narkotik və güclü təsiredici vasitələr təşkil edib.