2024-cü il üçün "Diversity Visa" (Green Card) proqramı işə salınıb

Amerika Birləşmiş Ştatlarının (ABŞ) Azərbaycandakı Səfirliyi oktyabrın 5-də 2024-cü il üçün ABŞ «Müxtəliflik Vizası» Proqramının (Green Card) başlanmasını elan edib.

ABŞ-da daimi yaşamaq, təhsil almaq və çalışmaq hüququnu qazandıran bu proqram hər il bütün dünyada həyata keçirilir.

Bu il müraciətlərin son tarixi 8 noyabrdır.

1990-cı ildən bəri tətbiq olunan «Green Card» proqramının məqsədi  Amerika əhalisi arasında mədəniyyət müxtəlifliyini artırmaqdır. 

Proqrama qoşulmaq üçün heç bir ödəniş tələb olunmur, seçim isə adi lotereya kimi təsadüfi qaydada aparılır.

Lotereya proqramında iştirak üçün minimum tələblər isə - 17 yaşdan yuxarı orta məktəb təhsili olmasıdır.

Azadlıq Radiosu xəbər verir ki, Azərbaycandakı ABŞ səfirliyi bildirir ki, qeydiyyatı yalnız rəsmi https://dvprogram.state.gov saytı vasitəsi ilə aparılmalıdır.

Səfirlik müraciətə yanlış məlumatlar əlavə edərək müraciət edənlərin şansını artırmağı təklif edən viza məsləhətçilərindən çəkinməyə də çağırıb. «Yanlış məlumatlar sizin müraciətinizə imtina verilməsinə səbəb ola bilər. Mümkünsə, formanı özünüz doldurun. Əgər köməyə ehtiyacınız varsa, sizə kömək edən şəxsin həqiqi məlumatlarınızı daxil etdiyinə əmin olun. Həm də pul tələb edən viza məsləhətçilərindən çəkinin, çünki onlar sizin qələbə şansınızı artıra biləcəklərini iddia edirlər. Biz məsləhətçilər ilə işləmirik və onlar sizin seçilmək şansınızı artıra bilməzlər».

Sentyabrın sonunda «Green Card Office»nin açıqladığı məlumatlara görə, «Green Card» proqramı üzrə ABŞ-da yaşayıb işləmək üçün bütün dünyadan ümumilikdə 7 milyon müraciət daxil olub. Onlardan 120 min nəfər lotereya qalibləri olublar. 

Azərbaycandan «Green Card» udanların sayı 1260 nəfər olub. Müqayisə üçün Rusiyadan lotereyanın qaliblərin sayı 5 505, Ermənistandan isə 3 525 nəfər olub.

ABŞ Dövlət Departamentinin saytında isə bildirilib ki, «Müxtəliflik Vizası» Proqramı üzrə 2021-ci ildə Azərbaycandan ümumilikdə onlayn müraciətlərin sayı 108 805 olub. Proqramın qaliblərin sayı üzrə son statistika isə 2018-ci ilə aiddir.

Qaydalara görə, Azərbaycanda yaşayan «Green card» qalibləri üçün viza görüşləri Gürcüstandakı ABŞ səfirliyində təyin edilir.

2020 və 2021-ci pandemiya illərində həmin qayda Azərbaycandan olan lotereya qalibləri üçün problemlər yaradıb.

2021-ci ilin avqustunda «Green Card» (Diversity Visa 2021) proqramına Azərbaycandan seçilmiş 1439 nəfər kollektiv şəkildə Turan İnformasiya Agentliyinə müraciət etmişdi. Onlar məhz viza müsahibələrin Gürcüstanda keçirildiyinə görə сох mürəkkəb durumda olduqlarını bildirmişdi.

Onlar qeyd etmişdi ki, koronavirus pandemiyası səbəbindən 2020-ci ilin sentyabrında başlanılmalı olan intervyular yeddi ay sonra - mart-aprel ayından başladı. «ABŞ Səfirliyində bu proses olduqca ləng aparılır. Proses sentyabrda bitəcək. Sonuncu statistikaya əsasən intervyu növbəsi gözləyən 1419 keysdən, buvaxtadək yalnız 74 keysə dəvət göndərilib, onlardan isə da cəmi 51 keysə visa verilib».

Azərbaycandakı ABŞ Səfirliyi isə məsələ ilə bağlı Turana bildirmişdi ki, pandemiya dövründə ABŞ səfirlikləri və konsulluqları əsas diqqəti xaricdəki ABŞ vətəndaşlarına xidmətlər göstərilməsinə, habelə təcili vizaların verilməsinə yönəlib. «Əlavə xidmətlər göstərə biləcək vəzifələr ABŞ vətəndaşlarının qohumlarının, o cümlədən həyat yoldaşlarının və övladlarının immiqrasiya vizalarına, beynəlxalq övladlığa götürülməsinə, həmçinin bəzi xüsusi immiqrasiya vizalarına üstünlük verir».

Səfirlikdən qeyd olunmuşdu ki, qeyri-immiqrasiya vizalarını rəsmiləşdirən məntəqələr də həddindən artıq humanitar məsələlərlə bağlı hallara və ictimai səhiyyəyə və ya milli təhlükəsizliyə həyati əhəmiyyət daşıyan dəstəyi göstərmək üçün səyahət edən şəxslər üçün nəzərdə tutulmuş hallara xüsusi diqqət yetirir. «ABŞ-ın xaricdə heç də bütün səfirlikləri immiqrasiya vizalarını, o cümlədən çoxprofilli vizaları emal etmir və bir sıra ölkələrin vətəndaşları immiqrasiya vizası üçün ərizələrini emal etdirmək üçün ən yaxındakı ABŞ səfirliklərinə getməlidirlər».

Vurğulanmışdı ki, pandemiyanın təxminedilməz xarakteri ilə əlaqədar «bu il nə qədər müxtəliflik vizası verəcəyimizi təxmin etmək qeyri-mümkündür, amma müvafiq gözləntiləri müəyyən etmək istəyirik və demək istəyirik ki, çox güman ki, 2021-ci il üçün qanunla icazə verilmiş bütün müxtəliflik vizalarını verməyəcəyik».

«Greencard Azerbaijan» şirkərindən isə Turana bildirilib ki, 2022-ci ildə növbəti il üçün Azərbaycandan «Green card» müraciətlərin sayı təxminən 80-90 min olub. «Azərbaycandan müraciət edən hər 100 nəfərdən təqribən biri qalib olur. Bu il ən cavan «Green card» qalibinin 17, ən yaşlının 64 yaşı var».

Şirkətdən qeyd olunub ki, əvvəlki illərdə müraciətlərin sayı artım xəttilə gedirdisə, son 3 ildə artım yoxdur. «Təxminən 3 il öncə «Green card» müraciəti üçün pasport məlumatlarını təqdim etmək tələbi yarandı. Bunun nəticəsində Azərbaycan da daxil olmaqla, bütün dünya üzrə «Green card» müraciətləri aşağı düşdü. Belə görünür ki, müraciət edənlərdən heç də hər kəsin pasportu olmur və ya vaxtı bitmiş olur. Digər səbəb təxminən 2 il öncə Azərbaycanda müharibənin baş verməsidir. Üçüncü səbəb - pandemiyanın  psixoloji təsiridir».

Qeyd olunub ki, əvvəllər kartı qazananların bəzən 35-40 faizi ABŞ-a getmirdi. «İndi bu göstərici təxminən 10-15 faizə enib».

Səfirlik hər il fırıldaqçılıqla mübarizə üçün tövsiyələr də verir.

Azərbaycandakı ABŞ səfirliyindən Turana bildirilib ki, saxta viza vasitəçiləri namizədlərə müraciətlərlə bağlı yardım edir, təsdiq nömrəsini özündə saxlayır, sonra isə həmin təsdiq nömrəsini müraciət edənə təqdim etməsi üçün böyük pullar tələb edir. «Namizədlər müraciətin doldurulması zamanı unikal təsdiq nömrəsinin alması və özündə saxlaması ilə və ya müraciətini şəxsən doldurmaqla özlərini bundan sığortalaya bilərlər».

Səfirlikdən qeyd olunub ki, Departament müraciətləri yalnız E-DV saytı vasitəsilə qəbul edir. Həmin saytda tam dolğun təlimarlar var. «Giriş üçün ödəniş tələb olunmur. Bütün namizədlər müraciətlərini doldurandan sonra öz təsdiq onlayn səhifəsini çap edib saxlamalıdılar ki, müraciətin statusunu yoxlaya bilsinlər. Namizədlər DV müraciətinin elektron formasına girişini 5 oktyabr-8 noyabrı əhatə edən qeydiyyat dövründə rəsmi https://dvprogram.state.gov/ saytında edə bilərlər. Proqram üzrə təlimatlar  həmçinin Dövlət Departamentinin internet səhifəsində mövcuddur https://travel.state.gov/content/travel/en/us-visas/immigrate/diversity-visa-program-entry/diversity-visa-instructions . HTML».

Səfirlikdən  vurğulanıb ki, namizədlər üçün öz unikal təsdiq nömrəsini ən azından 2024-cü ilin sentyabrın 30-a qədər saxlamağa vacibdir. «Təsdiq nömrəsi müraciətinin seçilib-seçilməməsini yoxlamaq üçün yeganə vasitədir. Müraciət seçilibsə namizədə yenə də təsdiq nömrəsi lazım olacaq ki, viza üçün müraciətini və viza müsahibəsi əlçatan olarsa bu barədə məlumatı əldə edə bilsin».

Bildirilib ki, 2023-cü ilin mayın 6-dan başlayaraq DV-2024 namizədləri https://dvprogram.state.gov/ saytında onlayn statusunu yoxlamaq üçün öz unukal təsdiq nömrəsindən istifadə edə bilərlər.