30 kənd pulsuz İnternet alacaq

İREX-Azerbaijan təşkilatı USAİD tərəfindən maliyyələşdirilən “On-line kənd” layihəsi çərçivəsində Azərbaycanın 30 kəndindən pulsuz İnternet köşklərini istismara verib. Köşklər 3 mindən 10 minədək sakin yaşayan kəndlərin poçt şöbələrində yerləşir. Sorğu zamanı əhalinin 96%-i bildirib ki, müntəzəm olaraq ödəmə və ya məktub göndərilməsi üçün poçt şöbələrinə baş çəkirlər. Azərbaycanda İnternetə çıxışın artmasına baxmayaraq, İnternet xidmətləri, xüsusən də kəndlərdə, bahalı olaraq qalır. Vətəndaşlar tez-tez kafelərə, İnternet-klublara gedərək və ya işdə İnternetdən istifadə edir.

İREX-Azərbaycanın 2012-ci il yanvar-may aylarında keçirdiyi sorğu göstərib ki, vətəndaşlar tez-tez telefon vasitəsilə İnternetə bağlanırlar, lakin onlar hesab edir ki, bu xidmət bahalıdır, İnternetin sürəti isə zəifdir.

Respondentlərin 54%-i bildirib ki, heç vaxt İnternetdən istifadə etməyiblər, amma kəndlərində İnternetə pulsuz çıxış olmasını arzu edərdilər.

Rəyi soruşulanların 82%-i İnternet kursu keçmək arzusunu bildirib.

Respondentlərin 19%-i elektron poçtdan istifadəni öyrənmək istədiyini bildirib. 27% sosial mediaya, 50% kompüter proqramlarına maraq göstərib.

Daha 2% vergilərin on-line ödənməsi ilə maraqlandıqlarını bildiriblər.

Bu tələbatların ödənməsi üçün İREX-Azerbaijan və USAİD Rabitə Nazirliyi ilə əməkdaşlığa başlayıb. Nəticədə 30 kəndin poçt şöbələrində pulsuz İnternet köşkləri quraşdırılıb. 2013-cü ildə köşklərin idarə edilməsi Rabitə Nazirliyinə veriləcək.

Köşklərdən səmərəli istifadə üçün poçt şöbələrinin əməkdaşları üçün treninqlər keçirilib. Bundan başqa, poçt şöbələrində kompüterlərdən və İnternetdən istifadə haqqında çap materialları yayılıb.

Oktyabrın 4-də Xaçmaz rayonunun Yergüc kəndində “On-line kənd” layihəsinin rəsmi təqdimatı keçirilib.

Son layihələr çərçivəsində Azərbaycanın 5 universitetində Wi-Fi sistemi quraşdırılıb. Bundan başqa, İREX-Azərbaycan 19 regionda İctimai İnformasiya Mərkəzləri yaradıb və yerli tərəfdaşlara təqdim edib.

Noyabrda İREX-Azərbaycan USAİD-in maliyyə dəstəyi ilə həyata keçirilən on-line jurnalistika üzrə təhsil layihəsinin təqdimatını keçirəcək. -06D-