Tofiq Yaqublu: Gürcüstandakı seçkilərin Azərbaycana təsiri olacaq

Gürcüstanda keçirilmiş parlament seçkiləri Güney Qafqazda ədalətli seçki nümunəsi ola bilər. Bu fikri Turan-a Gürcüstanda seçkilərdə müşahidəçi olmuş Müsavat Partiyasının sədr müavini Tofiq Yaqublu bildirib.

O, Gürcüstanda iqtidarla müxalifətin seçkilərə bərabər imkanlarla qatıldığını söyləyib. Deputatlığa namizədlərə və siyasi partiyalara sərbəst toplaşmaq azadlığı təmin edilib. Telekanallarda tərəflərin təbliğat kampaniyasına hər-hansı məhdudiyyət qoyulmayıb.

Seçkilərdə vətəndaş fəallığı yüksək olub, o cümlədən azərbaycanlıların yaşadığı Borçalı bölgəsində seçici fəallığı yüksəkliyinə görə əvvəlki seçkilərdən fərqlənib. Azərbaycanlı seçicilər arasında iqtidarın və eləcə də müxalifətin tərəfdarı olan seçicilər olub. Ən əsası bu seçkilərdə hər-hansı əsaslı saxtalaşdırma halları olmayıb. 

“Saakaşvili bu seçkilə bütün Gürcüstan və Qafqaza hakimiyyətə necə gəlmək və ən əsası hakimiyyətdən necə getmək nümunə və təcrübəsi göstərib”, - deyə T.Yaqublu Gürcüstandakı parlament seçkilərinin önəmli cəhətlərinə toxunub.

O, bu seçkilərin Azərbaycanda keçirilməsi nəzərdə tutulan seçkilərə müsbət təsiri olacağını söyləyib. “Yetər ki, Azərbaycan iqtidarı Gürcüstan iqtidarı kimi ədalətli, demokratik və azad seçkilər keçirməyə siyasi iradə nümayiş etdirsin”, - deyə T.Yaqublu qeyd edib. -05B-