Hüquq müdafiəçisi təqsirli şəxsin polis bölməsində ürəktutmasından öldüyünü deyir

Bakı sakini Rauf Korabeynikov Sabunçu rayon 13 saylı polis bölməsində ürəktutmasından vəfat edib. Bu haqda Turana İşgənclər Əleyhinə komitənin sədri Elçin Behbudov bildirib. 

O deyib ki, oğurluq və quldurluq etdiyinə görə R.Korabeynikov bu il oktyabrın 3-də həbs edilərək səhər saat 6 radələrində 13 saylı bölməyə gətirilib. Daha sonra bölmədən qaçıb, elə həmin gün yenə tutularaq saat 8 radələrində təkrar bölməyə gətirilib. Dindirilərkən ürəktutmasından vəfat edib. Təcili yardım çağırılsa da, həkim gələnə kimi R.Korabeynikov dünyasını dəyişib. Meyitin ekspertizası keçirilib, zorakılıq, işgəncə əlamətləri aşkarlanmayıb.   

Məsələni araşdırmaq üçün E.Behbudov Sabunçu rayon Polis İdarəsi 13 saylı Polis Bölməsinin rəhbərliyi ilə görüşdüyünü deyib. Daha sonra hüquq müdafiəçisi elə bu gün R.Korabeynikovun anası Svetlana Korabeynikova ilə görüşüb. Anası oğlunun hələ bu hadisəyə qədər analoji cinayətlərə görə iki dəfə məhkumluq həyatı yaşadığını nəzərə çatdırıb. Həm də son zamanlar ürək ağrılarından tez-tez şikayət etdiyini söyləyib.

E.Behbudov hər-hansı səbəb üzündən polis bölməsindəki ölümlərin cəmiyyətdə rezonansa səbəb olduğunu deyərək, belə ölümlərin araşdırılmasının vacib olduğunu xatırladıb. -05B-