A.Abdullayev: Bizə qarşı ancaq ittiham var, sübut yoxdur

Cümə axşamı Bakı Ağır Cinayətlər Məhkəməsində AMAY şirkətinin qurucusu Abdulla Abdullayev üzərində məhkəmə prosesi davam edib.

A.Abdullayev keçən dəfəki məhkəmə prosesində yarımçıq qalan çıxışını davam etdirib. İş adamı səlahiyyətindən sui-istifadə, pulların leqallaşdırılması ittihamlarına cavab olaraq ittiham tərəfə bu ittihamları təsdiq edən sübutları təqdim etmək təklifi ünvanlayıb. İndiki ittihamlar üzrə 4 il öncə məhkəmə prosesi keçirildiyini, məhkəmə qərarı olduğunu xatırladan AMAY rəhbəri təkrar ittiham irəli sürülməsini və məhkəmə porsesi qurulmasını əsassız adlandırıb. “Korrupsiyaya qarşı mübarizə idarəsi belə əməllərilə ölkəni fəlakətə aparır”, - deyə iş adamı bu quruma münasibət ifadə edib. Çirkli pulların leqallaşdırılması ittihamına cavab verən A.Abdullayev götrülən pulun da, sərf edildiyi yerin də, sənədlərin də, qoyulan girovların da məlum olduğunu deyib. Qanunvericiliyə isnadən iş adamı müqavilə öhdəliklərinə görə hüquqi şəxslərin həbsinin qanunsuz olduğunu xatırladıb. Korrupsiyaya qarşı mübarizə idarəsini qanunsuzluqda günahlandırıb. “82 cilddən ibarət cinayət materiallarında ancaq ittiham var, sübut yoxdur”, - deyə ittiham və cinayət işinin əsassızlığnı bir daha diqqətə çatdırıb.

A.Abdullayev Korrupsiyaya qarşı Mübarizə İdarəsinin kredit borcları ilə bağlı əmlakların dəyərləndirilməsində qanunsuzluğa yol verdiyini deyib. Belə ki, Qaradağda 15 ha sahəyə malik sement zavodunun 1 milyon manat dəyərləndirilməsinə etiraz edib. “Elə orada sement üyüdən avadanlığın dəyəri 1 milyon manatdan çoxdur”, - deyə A.Abdullayev bildirib. AMAY-a məxsus “Xətai” ticarət mərkəzinin dam örtüyünə ittiham tərəfin öncə 370 min manat qiymət qoyduğunu, sonradan isə bunu 720 min manata qaldırdığını deyib. O, bu qiymətələri olduqca aşağı dəyərləndirib. Mərkəzin 240 min kv.metr sahəsinin 40 milyon dəyərləndirildiyini deyən iş adamı bu binanın tikintisi zamanı verilən maaşların 57 milyon manat olduğunu nəzərə çatdırıb.

“Texnikabank”dan götürülən faizlərlə birgə 40 milyon manatın hələ 2013-cü ildə bağlanmasına baxmayaraq, yenə də bu məsələ üzrə ittiham var. A.Abdullayev kreditin alınması üçün frimalar yaradılması, məbləğin hissə-hissə firmalara verilməsi təklifinin məhz “Texnkabank”dan gəldiyini deyib. Hər-hansı mənimsəməyə, dələduzluğa yol verilmədiyini söyləyib. A.Abdullayev bunu ittihamın uydurması adlandırıb.

A.Abdullayev ölkə rəhbərliyinin bu cinayət işinin mahiyyətini əvvəl-axır biləcəyini deyib. Eyni zamanda, əmlakını mənimsəmək cəhdlərinə göz yummayacağını, sonuna qədər mübarizə aparacağını bildirib. “Bir yolunuz qalır ki, məni içəridə öldürməklə bəlkə buna son qoya biləsiniz”, - deyə A.Abdullayev mövqeyini ortaya qoyub.

Daha sonra cinayət işinə cəlb edilən digər şəxslər dindirilib. Bu şəxslər banklardan və sahibkarlığa yardım qurumlarından daxil olan vəsaitlərin “Xətai” ticarət mərkəzində tamamlama işlərinə cəlb edildiyini deyiblər. Bu şəxslər də irəli sürülən ittihamları uydurma, əsassız və saxta adlandırıblar.

Hakim Ə.Hacıyev A.Abdullayevlə bağlı məhkəmə prosesinin indiyə qədər olduğu kimi həftədə bir dəfə yox, günün birinci yarısı olmaqla həftədə 4 dəfə keçirilməsi haqda qərar verib.

A.Abdullayev 2014-cü ilin aprelində həbs edilib. Ona qarşı mənimsəmə, çirkli pulların yuyulması, səlahiyyətindən sui-istifadə, dələduzluq kimi ittihamlar irəli sürülüb. İş adamı bütün ittihmaları birmənalı olaraq rədd edir. -05C-