Aİ QHT-ləri höküməyonüllü dəstəkləyir?

Bakı/10.05.18/Turan: "Şərq Tərəfdaşlığı" Vətəndaş Cəmiyyəti Forumunun rəhbər komitəsi Avropa İttifaqının (Aİ) Azərbaycandakı ofisinin rəhbəri Kestutis Jankauskas-a müraciət edib. Mürciətdə Aİ-nin Azərbaycana ayırdığı maliyyə dəstəyinin QHT-lərin həyata keçirdiyi layihələrə şəffaf şəkildə ayrılmamasından narahatlıq ifadə edilib.

Müraciətin tam mətni qurumun internet səhifəsində yayılıb.

Müraciətdə Avropa İttifaqının Azərbaycandakı nümayəndəliyinin maliyyə yardımı ilə bağlı iki çağırışının nəticələrindən xüsusi məyusluq ifadə edilib. Söhbət təhsil sisteminin təkmilləşdirilməsi ilə bağlı 2016-cı ilin dekabrında, "İnklüziv təhsil"lə bağlı 2017-ci ilin mayında elan edilən layihə çağırışından gedir.

"Düçünürük ki, hər iki çağırış qeyri-şəffaf bir şəkildə həyata keçirilib və bu, Aİ normalarına uyğun deyil. Hər iki layihə çağırışı başa çatıb. İlk layihəyə görə vəsaitlər ayrılsa da, vəsaitlərin alıcılarının hansı təşkilatlar olmasına dair ictimaiyyətə heç bir açıqlama olmayıb", müraciətdə vurğulanır.

Müraciətdə hər iki layihənin hökumətin dəstəklədiyi QHT-lərə verilməsinə şübhələr olduğu ifadə edilib.

"Şərq Tərəfdaşlığı" Vətəndaş Cəmiyyəti Forumunun rəhbər komitəsi Aİ-nin Azərbaycan Ofisinə çağırış edib. Müraciətdə vurğulanır ki, hər iki layihə çağırışı ilə bağlı bilgilər ictimaiyyətə açıqlanmalıdır.

"Avropa İttifaqı Komissiyası Avropa vergi ödəyicilərinin pullarının müstəqil və əsl Azərbaycan vətəndaş cəmiyyətinə dəstək olmasına əmin olmaq üçün hər iki layihə çağırışının nəticələrini araşdırmalıdır", müraciətdə vurgulanır.

Azərbaycan Avropa İttifaqı ilə əsası 2009-cu ildə qoyulan "Şərq Tərəfdaşlığı" Proqramı çərçivəsində əməkdaşlıq edir. "Şərq Tərəfdaşlığı"na daxil olan ölkələrin QHT-ləri Vətəndaş Cəmiyyəti Forumu çərçivəsində əməkdaşlıq edir.

"Şərq Tərəfdaşlığı" Avropa Birliyinin altı qonşu ölkəsini əhatə edir. Bura Azərbaycan, Gürcüstan, Moldova, Ukrayna, Belarus və Ermənistan daxildir. Bu ölkələrdən Gürcüstan, Moldova və Ukrayna qurumla assosiasiya sazişi imzalayıb.

Ötən il noyabrın 24-də Brüsseldə keçirilən sammitdə Avropa İttifaqı Ermənistanla "Hərtərəfli və genişləndirilmiş partnyorluq razılaşması" (Comprehensive and Enhanced Partnership Agreement - CEPA) adlı sənədi imzalayıb.

Azərbaycanla isə bu istiqamətdə ötən ildən başlayan danışıqlar hələ ki, yekunlaşmayıb.--0-