Allahşükür Paşazadə: «Hər dövlət dini özünə tərəf çəkmək istəyir»

Qafqaz Müsəlmanları Idarəsində (QMİ) ikihəftəlik dini seminarı başa vuran  jurnalistlərlə görüş olub.

QMİ sədri bu seminarların davamlı olmasının vacibliyini vurğulayıb. Onun fikrincə, bu, həm dini terminologiyanı,  həm də dindaxili prosesləri qavramaq baxımından zəruridir. “Hər dövlət dinə öz baxış bucağından yanaşır, belə demək mümkünsə hər kəs dini özünə tərəf çəkmək stəyir. Bu baxımdan həm dini dəyərləri qorumaq, həm də dini fəsadlardan qorumaq ön plana çıxır. Ümidvaram ki, ikihəftəlik seminarda aldığınız bilgilər sizə dini yanaşmada düzgün mövqe seçməkdə yardımçı olacaq”,- QMİ sədri, şeyxülislam Allahşükür Paşazadə seminarı bitirən jurnalistlərə bildirib.

A.Paşazadə dini mövzuda yazan jurnalistlərə “Şeyxülislam” mükafatı verəcəyi bəyanatına tənqidi münasibətləri anlamadığını söyləyib: “Rusiyada belə mükafat var, başqa ölkələrdə var, orada tənqidlə qarşılanmır. Amma mən deyəndə ki, belə mükafat təsis edəcəyəm, tənqid olunuruq”. QMİ sədri bununla belə fikrindən dönmədiyini, dini mövzuda yazan jurnalsitlərə “Şeyxülislam” mükafatının veriləcəyini söyləyib.

  O, jurnalistlərə müraciət edərək seminarları daha məzmunlu etmək üçün təkliflər vermələrini istəyib. Tədbirin sonunda seminarı bitirən jurnalistlərə setifikatlar təqdim edilib.          

Xatırladaq ki, din üzrə ikihəftəlik seminarı 15 jurnalist bitirib.—0--