Almaniya vətəndaş fəalı Samir Aşurovu ölkədən çıxarıb

Bakı/31.03.22/Turan: Martın 29-da Almaniyadan çıxarılan otuz səkkiz nəfər Azərbaycan vətəndaşı arasında fəal, 37 yaşlı Samir Aşurov da var.

Turan-ın müxbiri ilə söhbətində bildirib ki, onu ailəsi- xanımı və iki uşağı ilə birlikdə deportasiya ediblər.

Deportasiyadan öncə polis onu kobud şəkildə saxlayıb, əllərini qandallayıb. Bakıya gələndən sonra həmin şəxslərlər "profilaktik söhbətlər" aparılıb. Onunla mülki geyimli əməkdaş və Dövlət Miqrasiya Xidmətinin formasında olan əməkdaşlar söhbət ediblər. Lakin fəal onlardan birinin digər güc qurumunun nümayəndəsi ola bilməsindən şübhələnir.

“Məndən soruşdular: “Yəqin Almaniyaya müalicəyə getmisən?”. Cavab verdim ki, yox, təqiblərə görə mühacirətə getmişəm və hər şeyi olduğu kimi danışdım, - Aşurov deyib.

2018-ci il 11 aprel prezident seçkiləri ərəfəsində və sonra fəal siyasi fəaliyyətinə görə iki dəfə həbs edilib. Əvvəlcə 30 gün, sonra isə 60 gün.

Ona eyham vurublar ki, əgər siyasi fəaliyyətini dayandırmasa, üçüncü dəfə cinayət ittihamı üzrə uzun müddət həbs edilə bilər.

2018-ci ilin sentyabrında Aşurov Almaniyaya mühacirət edib, lakin hakimiyyət ona sığınacaq verməkdən imtina edib.

Bundan öncə yerli hüquq müdafiəçiləri vətənlərində təqib olunma riskinə baxmayaraq, fəalları ölkədən çıxardığına görə Almaniya hakimiyyətini tənqid ediblər.

"Müdafiə xətti" təşkilatının məlumatına görə, ötən ilin noyabrından Almaniyadan çıxarılan dörd fəal narkotik maddələrin qanunsuz dövriyyəsilə bağlı uydurma ittihamlarla həbs olunub.

Onların hamısı Azərbaycanda insan hüquqlarının müdafiəsilə bağlı Almaniyada keçirilən siyasi aksiyalarda iştirak ediblər.

Azərbaycan vətəndaşlarının ölkədən çıxarılması Azərbaycanla Avropa İttifaqı arasında bağlanmış readmissiya haqqında sazişə uyğun həyata keçirilir.

2021-ci ildə Avropadan 420 nəfər Azərbaycan vətəndaşı readmissiya edlib. Avropa İttifaqı ilə sazişin imzalandığı vaxtdan, 2014-cü ildən 2013 nəfər göndərilib. – 06B-