AMAY rəhbərinin məhkəməsi yekunlaşmaq üzrədir

Cümə axşamı Bakı Ağır Cinayətlər Məhkəməsində AMAY şirkətinin rəhbəri Abdulla Abdullayev və təqsirləndirilən daha 5 nəfərin növbəti məhkəmə prosesi keçirilib.

Bugünkü məhkəmə prosesində şahid Tahir Mehdiyev dindirilib. O qeyd edib ki, yaratdığı firma vasitəsilə “Texnikabank”dan 80 min manat həcmində kredit götürüb. Pulun alınmasına dair qəbzə imza atıb, amma nağd olaraq götürməyib, pul AMAY-ın tərkibindəki “Birlkbank”a köçürülüb. T.Mehdiyev həmin vəsaitin digər 40-a yaxın  firmanın da götürdüyü vəsaitlər kimi AMAY şirkətinə məxsus “Xətai” Ticarət Mərkəzinin tikintisinə və tamamlama işlərinə sərf edildiyini nəzərə çatdırıb. 

Hakim şahidlər prosesə gəlmədikləri üçün məhkəmə iclasını bağlamaq istədikdə şirkət rəhbəri A.Abdullayev öz təkliflərini verib. Belə ki, ittiham üzrə 144 şahid var, həmin şahidlərin 54-ü dindirilib, 40 nəfərdən çox şəxsin adı cinayət materiallarında şahid kimi keçsə də istintaq onları dindirməyib. 30 nəfər şahid isə adı çəkilən məhkəmə prosesinə hər hansı şəkildə bağlı deyil, 15 nəfərə yaxın şahid teleqram vuraraq mövqelərini təsdiqləyiblər, 6 nəfər şahid isə dünyasını dəyişib. Bundan sonra vəkil Əkbər Bağırov vacib olan 5-6 şahidin qaldığını deyərək həmin şəxslərin məhkəməyə dəvət olunmalarını istəyib.

Belə başa düşmək olar ki,  yaxın 2-3 məhkəmə prosesindən sonra A.Abdullayev və təqsirləndirilən daha 5 nəfərin məhkəmə prosesi yekunlaşa bilər.

AMAY rəhbəri və vəkililə hakim arasında yaşanan polemikadan sonra hakim Əfqan Hacıyev növbəti prosesi mayın 25-i saat 10:00-a təyin edib.

AMAY şirkətinin rəhbəri A.Abdullayev 2014-cü il aprelində həbsə alınıb. Ona qarşı Cinayət Məcəlləsinin dələdzuluq, külli miqdarda dövlət vəsaitini mənimsəmə, səlahiyyətindən sui-istifadə, “çirkli” pulların leqallaşdırılması ittihamları irəli sürülüb.    

A.Abdullayev irəli sürülən itithamları rədd edərək özünü təqsirli saymır.

A.Abdullayev və təqsirləndirilən digər 5 nəfərin məhkəməsi yanvarın 29-da başlayıb və davam edir.-05C-