ANS-i Zoologiya İnstitutundan çıxarırlar

ANS televiziyası, ANS ÇM radiosu və ANSPRESS Agentliyi yerləşdiyi Azərbaycan Milli Elmlər Akademiyasının Zoologiya İnstitutunun binasından çıxarılır.

Zoologiya İnstitutunun direktoru Elman  Yusifov Turan-a bildirib ki, ANS icarə müqaviləsini Əmlak Məsələləri Dövlət Komitəsi ilə bağlayıb.

“Müqavilənin vaxtı  bitdiyindən ANS ilə yeni müqavilə bağlanmayıb. Binada ANS-in yerləşdiyi sahələrin artıq Zoologiya İnstitutuna qaytarılmasına start verilib. Təhvil-təslim üçün komissiya fəaliyyət göstərir. Sadəcə, ANS-in rəhbərliyi texniki avadanlıqları, maşın və mexanizmləri ərazidən çıxarmaq üçün vaxt verilməsini xahiş edib. Onlar yeni ofis icarəyə götürən kimi avadanlıqların boşaldılmasına başlanılacaq”, - o bildirib.

Milli Televiziya və Radio Şurası (MTRŞ) “ANS Müstəqil Yayım və Media” Şirkətinin yayımının 18 iyul 2016-cı ildən 1 ay müddətinə dayandırılması barədə qərar qəbul edib.

MTRŞ bu qərarı Türkiyə ilə Azərbaycan arasında strateji tərəfdaşlıq münasibətlərinin pozulmasına yönəlmiş təxribatın qarşısını almaq, açıq şəkildə terrorizmin təbliğatına yol verməmək məqsədilə Azərbaycan Baş Prokurorluğunun müraciətinə əsasən qəbul etdiyini bildirib.  

Bununla yanaşı, MTRŞ ANS-ə verilmiş 25 oktyabr 2013-cü il tarixli xüsusi razılığın (lisenziyanın) qüvvəsinə xitam verilməsi barədə məhkəmədə iddia qaldırıb. Bakı Apellyasiya Məhkəməsi MTRŞ-nin iddiasını təmin edib, ANS-in lisenziyasına xitam verilməsi ilə bağlı qərar qəbul edib.

MTRŞ həmçinin ANS-ÇM radiosunun lisenziyasını ləğv edib.

Bütün bunlar bu il iyulun 15-də Türkiyədə dövlət çevrilişinə cəhd zamanı ANS-in hadisələri işıqlandırması və televiziyanın müxbirinin Ankaranın dövlət çevrilişini  təşkil etməkdə  günahlandırdığı ABŞ-da yaşayan Fətullah Gülənin mətbuat konfransında iştirakından sonra baş verib. 

MTRŞ-nin nümayəndəsi bildirib ki, hətta Fətullah Güləni dəstəkləyən Türkiyə kanalları belə qiyamçıların bəyanatını oxuyan TRT aparıcısının audioyazısını efirdə yaymayıblar, ANS isə bunu dəfələrlə göstərib. Bundan əlavə, ANS tankların insanların üstünə getməsini, kəsilmiş başlar, əlləri göstərib ki,  bu da MTRŞ nümayəndəsinin fikrincə, vandalizm əlamətidir.

“Bizi Fətullah Gülənlə əlaqədə günahlandırmağın əsası yoxdur. ANS Azərbaycan qanunvericiliyinin bütün imkanlarından istifadə edərək hüquqlarının bərpası uğrunda mübarizəsini davam etdirəcək”,-  ANS Şirkətlər Qrupunun vitse-prezidenti Mirşahin Ağayev MTRŞ-a belə cavab verib.

O, ANS-in Avropa İnsan Hüquqları Məhkəməsinə müraciət edəcəyini istisna etməyib.

ANS-in prezidenti Vahid Mustafayev bildirib ki, Fətullah Gülənin mətbuat konfransında 15 müxtəlif ölkənin müxbirləri ilə birgə İHLAS Ajansı, CNN Türk kanalının reportyorları və ANS-in jurnalisti də iştirak edib. “Mətbuat konfransından videogörüntülər iyulun 18-də ANS-ə daxil olub. Lakin ANS bu reportajın efirə verilməməsi barədə qərar qəbul edib və reportajdan kiçik bir hissə belə efirə verilməyib”, - o qeyd edib.

Azərbaycanın ilk müstəqil televiziyası olan ANS 1991-ci il noyabrın 26-dan fəaliyyət göstərirdi.   -03B-