Apellyasiya Məhkəməsi AXCP fəalı Elvin Abdullayevin barəsində qərarı qüvvədə saxlayıb

  Cümə axşamı Bakı Apellyasiya Məhkəməsi Xalq Cəbhəsi Partiyasının gənc fəalı Elvin Abdullayevin şikayətini təmin etməyib. O, qanunsuz narkotik maddə alverində ittiham olunaraq 6 il müddətinə azadlıqdan məhrum edilib.

Vəkil Əli Mehdiyev məhkəmədə bildirib ki, E.Abdullayev uydurma ittihamla təqib edilir və həbsin əsl səbəbi onun hakimiyyəti tənqid etməsidir.

Vəkil həmçinin diqqəti ona yönəldib ki, E.Abdullayev saxlandıqdan sonra və üzərində axtarış aparılmadan əvvəl 8 saat ərzində Bakı polisində olub. Bu müddətdə onun yemək, tualetə getmək, hətta əlindəki qandalın fotosunu çəkərək Facebook-a yerləşdirmək imkanı olub.

“Əgər Elvin bunu edə bilibsə, deməli,  cibində narkotik maddə vardısa onu da harasa ata bilərdi”, - vəkil qeyd edib.

Müdafiə tərəfi Ali Məhkəməyə kassasiya şikayəti verəcək.

E.Abdullayev yerli və beynəlxalq hüquq-müdafiə təşkilatları tərəfindən siyasi məhbus kimi tanınıb.

E.Abdullayev Azərbaycan Pedaqoji Universitetinin tələbəsidir. Tələbələr  arasında hakimiyyəti tənqid etdikdən sonra onu prorektor çağırıb və bunun yolverilməz olduğunu bildirib. 2015-ci il yanvarın 8-də imtahandan sonra o saxlanılıb və guya üzərində 3 qr. heroin tapılıb.

E.Abdullayevə qarşı CM-in 234.4.3-cü maddəsi (iri həcmdə qanunsuz narkotik maddənin dövriyyəsi) ilə ittiham irəli sürülüb.

İyunun 1-də Bakı Ağır Cinayətlər Məhkəməsi E.Abdullayevi 6 il azadlıqdan məhrum edib.—06D--