Aqil Layıc da fərdi vəkillik fəaliyyətindən məhrum edildi

Bakı/18.07.19/Turan: Vəkillər Kollegiyası vəkil Aqil Layıcın fərdi fəaliyyətinə xitam verilməsi və onun 20 saylı Vəkil Bürosuna keçirilməsi barədə qərar qəbul edib. Bu barədə Turan-a vəkil A.Layıc bildirib.

O qeyd edib ki, onu seçim hüququndan məhrum ediblər ki, bu da qanuna ziddir.

Bundan öncə vəkil Elçin Sadıqovun barəsində də analoji qərar qəbul edilib.

Fərdi fəaliyyətin dayandırılması vəkilləri aztəminatlı insanlara pulsuz hüquqi xidmət göstərmək imkanlarından məhrum edir.

Çünki Büroda xidmət göstərən vəkillər xidmətə görə bu qurumun müəyyən etdiyi məbləği almalı olacaqlar.

Keçmiş vəkil Yalçın İmanov Turan-a deyib ki, vəkillərin fərdi fəaliyyətinə xitam verilməsi "Vəkil və vəkillik fəaliyyəti haqqında" qanunun 5-ci maddəsinə ziddir. Onun sözlərinə görə, həmin maddəyə əsasən vəkil qanunvericilik tələblərinə uyğun vəkil tərəfindən yaradılmış qurumların tərkibində fəaliyyəti həyata keçirə bilər. Vəkillik fəaliyyətinin təşkilati-hüquqi forması vəkillər tərəfindən könüllü olaraq seçilir. "Ona görə də Vəkillər Kollegiyasının qərarı qanuna ziddir. Kollegiyanın vəkillərin fərdi fəaliyyətiniə xitam vermək istəyirsə, qanunvericilik dəyişməlidir. Bu isə baş verməyib və baş verənlər müstəqil fəaliyyət formasına müdaxilə deməkdir. Hesab edirəm ki. bu qanunsuzdur", - o bildirib.

Y.İmanov vurğulayıb ki, burada məqsəd müstəqil vəkillərin fəaliyyətini çətinləşdirmə ola bilər. "Hər iki vəkil insan hüquqları ilə məşğul olan və həssas işlərdə çıxış edən vəkillərdir. Çox güman ki, onların fəaliyyətini nəzarətə almaq məqsədini güdürlər. Fərdi qaydada fəaliyyət göstərən vəkillər üçün order almaq, vaxtında özünü müştərinin yanına çatdırmaq problem olmur. Amma vəkil büronun əməkdaşı olanda order götürmək və digər prosedurları həyata keçirmək uzun zaman tələb edir və müdafiənin keyfiyyəti itir".- Y. İmanov bildirib.

Vəkillər Kollegiyasının üzvü Anar Qasımlı isə qeyd edir ki, söhbət heç də vəkillərin fərdi fəaliyyətinə xitam verilməsindən getmir:

"Fərdi qaydada fəaliyyət göstərən və qanunvericiliyin tələblərini pozan vəkillər Rəyasət Heyətinin qərarına əsasən, hazırda fəaliyyət göstərdikləri ərazilər üzrə müvafiq bürolara keçirilirlər. 2019-cu ilin fevral ayınadək mən özüm də fərdi qaydada fəaliyyət göstərən vəkil olmuşam. Buna görə məlumatlıyam ki, Vəkillər Kollegiyası tərəfindən fərdi qaydada fəaliyyət göstərən vəkillərin qanunvericiliyin tələblərinə riayət edib-etməmələri müvafiq Komissiya tərəfindən araşdırılırdı".

Anar Qasımlının sözlərinə görə, onun da fəaliyyəti araşdırılıb:

"Araşdırma zamanı vəkilin fərdi qaydada fəaliyyət göstərməli olduğu ünvanda fəaliyyət göstərib-göstərməməsi, vergini, sosial ödənişləri, habelə vəkil məsuliyyətinin sığortası haqqını ödəyib-ödəməməsi, statistik hesabatları düzgün və vaxtlı-vaxtında təqdim edib-etməmələri yoxlanılırdı.Təəssüf ki, bəzi həmkarlarımızın yoxlanması zamanı onların fərdi vəkil kimi fəaliyyət göstərmək üçün Kollegiyaya təqdim etdikləri ünvanda fəaliyyət göstərmədikləri, qeyd olunan ödənişləri vaxtlı-vaxtında ödəməməsi və yaxud heç ödəməməsi kimi neqativ hallar aşkar olunmuşdur. Ona görə də Rəyasət Heyəti bu cür qərar qəbul etmək məcburiyyətində qalıb".

Anar Qasımlının sözlərinə görə, hər hansı bir vəkilin fərdi qaydada, yaxud bu və ya digər vəkil bürosunda fəaliyyət göstərməsi Rəyasət Heyətinin qərarı əsasında mümkün olur:

"Fərdi qaydada fəaliyyət göstərən vəkilə hansı hüquqi ünvanda fəaliyyət göstərməyə icazə verilibsə, o, məhz həmin ünvanda fəaliyyət göstərməlidir. Əgər o, ofisini dəyişirsə, bu barədə öncədən Rəyasət heyətinə yazılı ərizə ilə müraciət etməli və yalnız Rəyasət Heyətinin qərarəndan sonra başqa ofisə köçməlidir."

Anar Qasımlının vurğulamasına görə, vəkilin ofisi vəkil sirrinin qorunması üçün mühüm əhəmiyyət kəsb edir:

"Hesab edirəm ki, Rəyasət Heyətinin qəbul etdiyi qərar kifayət qədər humanist qərardır. Məsələn, Rəyasət Heyəti Şəkidə fərdi qaydada fəaliyyət göstərməli olan, lakin Şəkidə ofisi olmayıb, özünə Bakıda qeyri-qanuni ofis açıb Bakıda fəaliyyət göstərən vəkili Şəki şəhər Vəkil Bürosuna təhkim edə bilərdi..."

Anar Qasımlı qeyd edib ki, həmin vəkillər yenidən Rəyasət Heyətinə müraciət edərək başqa büroya keçirilmələri və yaxud Bakı şəhərində fərdi qaydada fəaliyyət göstərmələrinə icazə verilməsi barədə qərar verilməsini xahiş edə bilərlər.

Onun deməsinə görə, bəzi şəxslər "Vəkillər və vəkillik fəaliyyəti haqqında" Qanunu yanlış təfsir edirlər.-021С=