Media-icmal 19.07.19

Paytaxt Bakının Avropa Gənclərinin XV Yay Olimpiya Festivalına ev sahibliyi etməsi, Xırdalan şəhərində yaşanan su problemi, İnternet sahəsindəki vəziyyət və s. məsələlər bugünkü (19 iyul, 2019-cu il) medianın aparıcı mövzularındandır.

Yeniyetmə və gənclərin ünsiyyət məkanı

"Azərbaycan" qəzeti "Bakıda idman bayramı" sərlövhəli məqalədə iyulun 21-də start götürəcək Avropa Gənclərinin XV Yay Olimpiya Festivalına Azərbaycanın ev sahibliyi etməsini dəyərləndirir.

Bakını Avropanın "idman paytaxtı" adlandıran müəllif yada salır ki, Bakı 2015-ci ildə I Avropa Oyunlarına, 2017-ci ildə IV İslam Həmrəyliyi Oyunlarına ev sahibliyi edib.

İyulun 21-dən isə paytaxt Bakının Avropa Gənclərinin XV Yay Olimpiya Festivalına ev sahibliyi edəcəyini bildirən müəllif bunu Azərbaycana yüksək inam və etibarın daha bir nümunəsi adlandırır.

Müəllifin deməsinə görə, bir həftə davam edəcək yarışlara 48 Avropa ölkəsindən 3600-dən çox idmançı və texniki nümayəndə heyəti qatılacaq, 135 medal dəsti uğrunda, 12 arenada 10 idman növü üzrə (bədii gimnastika, atletika, basketbol, velosiped, həndbol, cüdo, üzgüçülük, tennis, voleybol, güləş) keçiriləcək yarışlara ümumilikdə 2500-dən çox könüllü cəlb olunacaq.

Müəllifin fikrincə, görülən hazırlıq işləri deməyə əsas verir ki, Bakının ev sahibliyi edəcəyi Avropa Gənclərinin XV Yay Olimpiya Festivalı yüksək səviyyədə təşkil olunacaq, çünki idmançıların ədalətli mübarizəsi üçün hər cür şərait yaradılıb.

Müəllif Avropa Gənclər Festivalının keçirilməsinin tarixi barədə deyir ki, bu ideya 1990-cı ildə irəli sürülüb, 14-18 yaşlılar arasında gənc avropalı idmançıları bir araya gətirən yarış ilk dəfə 1991-ci ildə Belçikanın paytaxtı Brüsseldə keçirilib.

Müəllifin deməsinə görə, iki ildə bir dəfə (cüt deyil, tək illərdə) - qışda və yayda keçirilən Avropa Gənclər Olimpiya Festivalı Avropa Olimpiya Komitəsi adından təşkil olunur.

Yazıda vurğulanır ki, festivala evsahibliyi edən ölkə bütün yarışlarda əvvəlcədən təsnifat mərhələsi olmadan iştirak etmək hüququ qazanır.

Müəllif deyir ki, Avropa Gənclərinin XV Yay Olimpiya Festivalının məşəli bu ilin aprelində İtaliyanın paytaxtı Romada Ara Pasis muzeyində alovlandırılıb, festivalın simvolu sayılan "zeytun ağacı" Azərbaycana təqdim olunub və Azərbaycan tərəf tədbirdə iştirak edib.

Müəllif deyir ki, gənclər və idman naziri Azad Rəhimov tədbirdə qeyd edib ki, 2018-ci ilin mayında prezident İlham Əliyevin imzaladığı sərəncam əsasında "Bakı-2019" Təşkilat Komitəsi yaradılıb: "...Bu gecə Oyunların məşəli qədim Romadan tarixi Bakıya - "Odlar diyarı"na gedəcək. Eyni zamanda qədim "zeytun ağacı" da Bakıya aparılacaq. Bu ağac sülhün, dostluğun rəmzi olmaqla Avropa Gənclərinin Yay Olimpiya Festivalının dərin köklərini nümayiş etdirir".

Son olaraq isə müəllif deyir ki, irimiqyaslı idman tədbiri ölkələri və insanları dostluq şəraitində bir araya gətirir, Avropa Gənclərinin XV Yay Olimpiya Festivalını təşkil edən Bakı həm də 14-18 yaşlı idmançılar arasında ünsiyyətin qurulacağı məkan olacaq.

Su olmaması onların vecinə də deyil

"Yeni Sabah.az"da isə isə "Xırdalanda su böhranı yaranıb-sakinlər etiraz edir" sərlövhəli məqalə oxumaq olar.

Müəllif bir neçə gündür ki, Xırdalan şəhərində suyun olmaması, sakinlərin buna narazılıq etməsi, aidiyyatı qurumların isə problemə laqeyd yanaşmasını müzakirəyə çıxarır.

Müəllifin deməsinə görə, artıq bir neçə gündür ki, Xırdalan şəhərində su yoxdur, sakinlər su problem yaşayırlar, həm də buna narazılıq bildirirlər və bu narazılıq əksini sosial şəbəkələrdə tapır.

"Yeni Sabah" bildirir ki, Xırdalan şəhər sakini olan iqtisadçı-ekspert Rövşən Ağayev də problemə öz münasibətini bildirib və onun deməsinə görə, Xırdalanda iki gündən çoxdur ki, suyun olmaması "Azərsu"nun vecinə deyil: "Onsuz da heç vaxt bu şirkətdən keyfiyyətli xidmət gözləmirəm. Çünki korporativ idarəçiliyin olmadığı, xidmətlər bazarında monopol olan, pis xidmət göstərəcəyi halda tenderin nəticələri ləğv olunaraq başqa şirkətə keçəcəyindən qorxusu olmayan, şəffaflıq, hesabatlılıq və ictimai iştirakçılıqla bağlı ciddi sorunları olan, dövlətdən istədiyi vaxt istədiyi qədər maliyyə alan (ya da onun zəmanətilə böyük kreditlər götürən) bir şirkət heç vaxt keyfiyyətli xidmət göstərə biıməz", ekspert su probleminin hələ də həllini tapmamasının səbəblərinə toxunur.

R. Ağayev deyir ki, su paylaşdırma şəbəkəsi bir çox Qərb ölkələrində olduğu kimi ya tender əsasında peşəkar, keyfiyyətli xidmətlə bağlı dövlət və cəmiyyət qarşısında sərt öhdəliklər götürən özəl operatora verilməli idi, ya da Türkiyə modelində olduğu kimi yüksək ictimai nəzarət və kollektiv idarəçiliyin təmin edildiyi bələdiyyə şirkətlərinin sərəncamında qalmalı idi.

R.Ağayev "Azərsu" ASC-nin sakinlərlə ünsiyyətində də böyük çatışmazlıqların olduğunu vurğulayıb: "Ən maraqlısı nədir? Hətta müştəri ilə normal kommunikasiya qurmağı belə bacarmırlar: "955 -Çağrı Mərkəzi"nə zəng etmişəm, 25-ci adam kimi qeydə alıblar, telefonun dəstəyini 15 dəqiqəyə yaxın qulağımda saxlayandan sonra növbə mənə çatıb.

Və daha maraqlısı. Hər dəfə mənə növbəmin neçənci olduğunu xatırladan "avtocavab"da bir müddət xəbərdarlığın əvvəli öz dilimizdə, sonu isə ingilis dilində gəlirdi. Məsələn, belə: "Sizin növbəniz thirteen".

Növbə 10-dan aşağı düşəndən sonra bütün cavablar Azərbaycan dilinə keçdi və narahatlığın aradan qalxdığını düşünmək istəyirdim ki.. xanım əməkdaş dedi ki, bu gün də su olmayacaq".

Sayı bilinməyən qapadılan saytlar

"Hürriyyət.org"da isə "Nəqliyyat, Rabitə, Yüksək Texnologiyalar Nazrilyi (NRYTN) bloklanan saytların siyahısından ibarət resurs hazırlamalıydı"-Osman Gündüz" sərlövhəli məqalə diqqəti çəkir.

Müəllif İnternet sahəsindəki vəziyyət və problemlərlə bağlı Azərbaycan İnternet Forumunun prezidenti Osman Gündüzlə söhbətləşir.

"İnterneti ölkəyə gətirən magistral (backbone) provayderlərdən biri , "DeltaTelecom" elan etdi ki, provayderlər üçün İnternet xidmətlərinin topdansatış qiymətlərini 70% endirir. Bunu "Hürriyət.org"a Azərbaycan İnternet Forumunun prezidenti Osman Gündüz bildirib.

"Adətən bu cür endirimlərdən sonra provayderlər də istifadəçilər üçün İnternet xidmətlərinin qiymətlərini endirirdilər və ya qiymətləri saxlayıb İnternetin sürətini qaldırırdılar. Bu dəfə bu, baş vermədi", O.Gündüz bəhs olunan sahədə vəziyyəti belə dəyərləndirir.

O.Gündüz problemin həllini tapa bilməməsinə problem kimi haqqında bəhs olunan nazirliyin özünü göstərir: "Bu məsələni tənzimləməli olan qurum elə Nəqliyyat, Rabitə və Yüksək Texnologiyalar Nazirliyi olduğundan problem öz həllini tapmadı", -O.Gündüz bununla problemin nazirliyin özündə olduğunu iddia edir.

İnternet Forumun prezidentinə görə, problemin yaranma səbəbi çox sadədir və elə də baş sındırmağına dəyməz: "Səbəb isə belə izah olundu ki, Nəqliyyat, Rabitə və Yüksək Texnologiylar Nazirliynə (NRYTN) tabe olan və İnternet bazarının 50%-nə nəzarət edən dövlət provayderləri endirim etməkdən imtina edirlər. Bu məsələni tənzimləməli olan qurum da elə NRYTN olduğundan problem öz həllini tapmadı", -O. Gündüz əlavə edib.

O.Gündüz bu sahədə bloklanan saytlar məsələsinə də münasibət bildirərək deyir ki, ölkədə xeyli sayt var ki, bloklanıb.

Amma O.Gündüz əlavə olaraq vurğulayır ki, indiyə kimi bloklanan saytların sayı, siyahısı məlum deyil: "Bloklanan saytların siyahısını heç kim bilmir. Çünki həmin "İnformasiya, informasiyalaşdırma və informasiyanın mühafizəsi haqqında" qanuna görə, Nəqliyyat, Rabitə və Yüksək Texnologiyalar Nazirliyi bloklanan saytların siyahısından ibarət resurs hazırlamalı və bunu açıqlamalı idi".

İnternet Forum prezidentinin deməsinə görə, bu onlayn resursda "qara siyahıya" düşən saytların bağlanma səbəbləri qeyd olunmalıydı: "Sayta daxil olmaq istədikdə isə bloklanma səbəbi göstərilən mesaj-məhkəmə qərarı görünməli idi. Nəqliyyat, Rabitə və Yüksək Texnologiyalar Nazirliyi isə indiyədək də bu resursu hazırlamayıb".