Arif və Leyla Yunusların məhkəməsi sürətlə gedir: sabah prokuror çıxış edəcək (YENİLƏNİB)

Çərşənbə günü hüquq müdafiəçiləri Leyla və Arif Yunusun işi üzrə məhkəmə prosesi sənədlərin araşdırılması ilə başa çatıb.

Vəkil Elçin Qəmbərov jurnalistlərə bildirib ki, məhkəmə A.Yunusun səhhətinin pis olması səbəbindən dinləmələrin təxirə salınması barədə müdafiə tərəfinin vəsatətini təmin etməyib və prosesi davam etdirib.

A.Yunusun halı pisləşdiyi zaman məhkəmə zalına həkim dəvət olunub, ona iynə vurulub.

Bu gün hakim məhkəmə istintaqının başa çatdığını elan edərək prokurorun çıxışını avqustun 6-na təyin edib.

Qeyd edək ki, Azərbaycanda siyasi məhkəmələr adətən uzun və sıxıcı keçir.

Bu dəfə hakimiyyət prosesi sürətlə keçirir ki, bu da ondan xəbər verir ki, prosesi mümkün qədər tez başa çatdırmaq istəyir.–03С-

2015 Avqust 05 (Çərşənbə) 12:38:12

Arif Yunusun səhhəti pisləşib. Bu barədə vəkil Ramiz Məmmədov məhkəmə zalından çıxdıqdan sonra jurnalistlərə bildirib.

Onun sözlərinə görə, A.Yunus proses zamanı müttəhimlər kürsüsündə uzanıb, ona tibbi yardım göstərilmir. Məhkəmə iclasından öncə iynə vurulub.

L.Yunus həyat yoldaşına tibbi yardımın göstərilməsini tələb edib. Hakim bildirib ki, lazım  olarsa yardım göstəriləcək.

Vəkilin sözlərinə görə, məhkəmə əlavə şahidlərin və donor təşkilatlarının nümayəndələrinin çağırılması barədə müdafiə tərəfinin vəsatətinə baxmayıb.

Sonra prosesdə sənədlərin araşdırılmasına başlanılıb.

L.Yunus dövlət ittihamçısına müraciət edərək onu “cəllad” adlandırıb.

Azərbaycanın məhkəmə praktikasında yataq xəstəsinin məhkəmə prosesinin keçirilməsi halı olmayıb. Görünür, Bakı Ağır Cinayətlər Məhkəməsində Misirin təcrübəsindən istfadə etmək qərarına  gəliblər. Belə ki, orada da diktator Mübarəki belə mühakimə etmişdilər. Ancaq o, xərəkdə uzanmışdı, müttəhimlər üçün ayrılan taxta skamyada yox.  —06D-

2015 Avqust 05 (Çərşənbə) 12:09:54

Çərşənbə günü Bakı Ağır Cinayətlər Məhkəməsində Leyla və Arif Yunusların işi üzrə prosesə yenə jurnalistlər, vətəndaş cəmiyyətinin fəalları və beynəlxalq təşkilatların nümayəndələri buraxılmayıblar.  Yalnız ABŞ, Böyük Britaniya və Almaniya səfirliklərinin əməkdaşları prosesdə iştirak edə biliblər.

Məhkəmə administrasiyası lazım bildiyi adamları arxa qapıdan zala buraxıb. Tezliklə həmin şəxslərdən biri, özünü adı heç yerdə çəkilməyən Şah İsmayıl Partiyasının rəhbəri adlandıran Emin Ədalətli zaldan çıxıb. O, iclasın əvvəlində L.Yunus səhhətinin pisləşdiyini bildirib: o 15 kiloqram arıqlayıb, dərmanları qurtarıb. Sonra dərman alınması üçün Almaniya səfirliyinin nümayəndəsinə müraciət edib.

A.Yunusun da halı pisləşib və zalda iştirak edən həkim ona dərman verib.

L.Yunus prosesin ədalətsiz aparılmasına etirazını bildirib. 

AXCP lideri Əli Kərimli Yunusların məhkəmə prosesinin qapalı keçirilməsini pisləyib.

“Leyla və Arifə böhtan atıblar. Əgər onların günahı sübuta yetirilsəydi hakimiyyət prosesi açıq keçirərdi. Onlar nə gizlədirlər?  Bu, bir daha göstərir ki, ər-arvad heç bir cinayət törətməyib və hökumətin  sifarişi ilə həbs olunublar.

Belə olan halda heç bir ədalətli məhkəmədən söhbət gedə bilməz. Siyasi sifariş yerinə yetiriləcək və onları azadlıqdan məhrum edəcəklər”, - Ə.Kərimli bildirib.—03C06-