Aslan İsmayılov: Cəzasızlıq yeni cinayətlərə rəvac verir

Vəkil Aslan İsmayılov “Opianus” MMC şirkətinə məxsus sexin basqına məruz qalması ilə bağlı çərşənbə günü mətbuat konfransı keçirib.

Adı çəkilən şirkətə məxsus sex Biləcəri qəsəbəsində yerləşir. Vəkil basqının noyabrın 28-i gecə saatlarında başlandığını deyib. Şirkətin rəhbəri Dilbər Rzayeva 2 saat basqınçılara müqavimət göstərib. Bu müddət ərzində polisə dəfələrlə müraciət olunsa da, polislər hadisə yerinə gəlməyiblər. Basqını edən isə Zülfüqarlı qardaşlarına məxsus zavodun zahirən sahibi Rasim Məmmədovun adamları olub. Basqına zavodun əməkdaşlarından Fariz Ramizzadə adlı şəxs başçılıq edib. Basqının məqsədi sexdəki metalları və hazır məhsulları aparmaq olub. Vəkil qeyd edib ki, iki saatdan sonra hadisə yerinə gələn polislər basqınçıları saxlamayıb, sadəcə sexə məxsus məhuslları aparmamağı xahiş edib.

A.İsmayılov xatırladıb ki, belə bir basqın bir dəfə də yay aylarında olub. O zaman F.Ramizzadəyə qarşı xuliqanlıq maddəsilə cinayət işi qaldırılıb, o, bir gün polisdə saxlanılıb və sonra sərbəst buraxılıb. Cinayət işi Bakı şəhər prokurorluğunda olsa da, adı çəkilən şəxs barəsində indiyə kimi hər-hansı tədbir görülməyib. “Göründüyü kimi, cəzasızlıq yeni cinayətlər törədilməsinə münbit şərait yaradıb”, - deyə vəkil baş verən hadisələrə mövqeyini ifadə edib. -05B-