AXCP fəalı saxlanılıb

Bakı/07.02.23/Turan: Xalq Cəbhəsi Partiyasının Salyan rayon təşkilatının sədri Əlizamin Salayev bıçaq xəsarəti yetirməkdə şübhəli bilinərək saxlanılıb. Bu barədə Turan-a onun oğlu Oqtay Salayev bildirib.

"Fevralın 7-də səhər saat 6 radələrində atam zəng edib saxlanıldığını dedi. Gecə o, Bakıdan Salyandakı (130 km) evinə qayıdırdı və Lökbatan qəsəbəsində yoldan keçən maşın gözləyirdi. Bu zaman əlində bıçaq olan bir nəfər ona hücum edib. Atam özünü qorumağa çalışıb və bu zaman peyda olan polis əməkdaşları atamı saxlayıblar - guya hadisədə o təqsirlidir.

Atam dedi ki, onu CM-in 126-cı (sağlamlığa qəsdən ağır zərər yetirmə) maddəsi ilə ittiham edirlər. O, bunun planlaşdırılmış təxribat olduğundan əmindir", deyə fəalın atası bildirib.

DİN-in mətbuat xidmətindən Salayevin bıçaq xəsarəti yetirməkdə şübhəli bilindiyini təsdiq ediblər. DİN-in məlumatına görə, fevralın 7-nə keçən gecə Sahil qəsəbə sakini Natiq Süleymanovun qarnına və qoluna bıçaq xəsarəti yetirilib. Hücum edən şəxs hadisə yerindən qaçıb gizlənib. Yaralı xəstəxanaya yerləşdirilib. Polis əməkdaşları şübhəli Zamin Salayevi saxlayıblar, deyə DİN-in mətbuat xidmətindən Turan-a bildiriblər.

Salayev bundan əvvəl də dəfələrlə inzibati və cinayət ittihamları ilə həbsə məruz qalıb. 06В