AXCP fəalının ittihamı ağırlaşdırılıb

Martın 6-da Azərbaycan Xalq Cəbhəsi Partiyasının (AXCP) fəalı Fuad Əhmədliyə qarşı irəli sürülmüş ittihamlar daha da ağırlaşdırılıb.

Fuad Əhmədli 2016-cı il avqustun 18-də saxlanılıb.

Dövlət Təhlükəsizliyi Xidməti və Baş Prokurorluğun açıqlamasında qeyd edilirdi ki, “Azerfon” MMC-də zənglər mərkəzində operator işləmiş F.Əhmədli abunəçilərə aid fərdi məlumatları, antenalar üzrə olduqları yerləri müəyyən adamlara ötürüb.

İddiaya görə, onun yaşadığı evdən axtarış zamanı qanunvericiliklə qadağan edilmiş dini ədəbiyyat, CD-disklər, Fəthullah Gülənin çıxışları, “Hizmet imamları” adlandırılan şəxslər və onların qarşılıqlı əlaqələrinə dair sənədlər götürülüb.

Müdafiə tərəfi ittihamları əsassız adlandırıb. AXCP isə bəyanat verərək bunu onlara təzyiqlərin davamı kimi dəyərləndirib.

Son məlumatlara görə, AXCP fəlları Fuad Əhmədli, Faiq Əmirli (AXCP sədrinin köməkçisi, “Azadlıq” qəzetinin maliyyə direktoru) və Elçin İsmayıllının (İsmayıllı rayonunda həbs edilib, AXCP fəalı, jurnalist) cinayət işləri eyni icraatda birləşdirilib.

Vəkil Əsabəli Mustafayev Turan-a bildirib ki, bu gün 1 saylı Bakı İstintaq Təcridxanasında Fuad Əhmədliyə qarşı istintaq hərəkətləri həyata keçirilib. O, yenidən dindirilib.

“Sadəcə olaraq Fuad Əhmədliyə qarşı irəli sürülən köhnə ittihamı yenidən köçürüblər. Amma, bu dəfə ona qarşı bundan öncə irəli sürülmüş Cinayət Məcəlləsinin 302 (əməliyyat-axtarış fəaliyyəti üzrə qanunvericiliyi pozma) və 308-ci (vəzifə səlahiyyətlərindən sui-istifadə) maddələrinin birinci hissəsi ilə deyil, ikinci hissəsi ilə ittiham veriblər”, deyə o qeyd edib.

Vəkilin sözlərinə görə, Fuad Əhmədov dindirmə zamanı əvvəllər olduğu kimi hər hansı günahının olmadığını deyib.

“Fuad Əhmədov bildirdi ki, onda hər hansı gizli informasiya olmayıb, informasiyanı hər hansı gizli yolla, xakerlik etməklə əldə etməyib. Vəzifəli şəxs olmayıb. Vəzifəli şəxsin hüquqi tərifi var. Fuad Əhmədzadə texniki işçi olub və rəhbərlik tərəfindən ona verilmiş məlumatları müştərilərə ötürüb”, deyə vəkil qeyd edib.

AXCP fəalına qarşı əvvəlki ittihamlarda 3 ilədək həbs nəzərdə tutulurdusa, indiki ittihamların sanksiyasında 8 ilədək həbs var. -03B-