Azərbaycan üzrə Milli Platforma Anar Məmmədliyə azadlıq tələb edir

Şərq Tərəfdaşlığı Proqramının Vətəndaş Cəmiyyəti Forumunun Azərbaycan üzrə Milli Platforması (VCFAMP) platforma üzvü olan Seçkilərin Monitorinqi və Demokratiyanın Tədrisi Mərkəzi (SMDTM) ictimai təşkilatının rəhbəri Anar Məmmədlinin həbsinə etiraz olaraq bəyanat yayıb.

A.Məmmədlinin barəsində 3 aylıq həbs qətimkan tədbirinin seçilməsi də qəti şəkildə pislənilir. Seçkiləri monitorinq edən qurum rəhbərinin seçkilərin nəticəsini şübhə altına aldıqdan iki həftə sonra vergi istintaqına cəlb olunması bu həbsin siyasi olmasına ciddi əsaslar  yaratdığı deyilir.    

Milli Platforma çərçivəsində A.Məmmədlinin fəaliyyəti yüksək dəyərləndirilir, vətəndaş cəmiyyətinin çox nüfuzlu fəallarından olduğu qeyd edilir. SMDTM-nin  hesabatlarının təkcə ölkə daxilində yox, ölkədən kənar da yüksək dəyərləndirildiyi nəzərə çatdırılır. 

SMDTM-nin ölkədə keçirilən 12 seçkini müşahidə etdiyi, minlərlə könüllü müşahidəçiyə 600-dan çox təlim keçdiyi vurğulanır. SMDTM ATƏT-ə üzv 17 ölkədən 22 QHT-ni birləşdirən Avropa Şəbəkəsinni üzvüdür. Qurumun 360 nəfərdən artıq üzvü Beynəlxalq Seçki Müşahidə missiyalarında iştirak edib, bir çox dünya dövlətlərində keçirilən seçkiləri müşahidə edib. A.Məmmədliyə qarşı seçilərin nəticələrini saxtalaşdırması ittihamı absurd sayılır.    

Müəlliflər iqtidarı A.Məmmədlini azad etməyə, ona qarşı ittihamlara son qoymağa çağırılarşı. İqtidarı siyasi həbslərin ölkənin imicinə zərbə olmasını anlamağa səsləyirlər. 

Platforma üzvləri beynəlxalq təşkilatları Anar Məmmədlinin həbsini pisləməyə, rəsmi Bakıya təsir göstərməyə və bu yöndə VCF-nin mövqeyinə dəstək verməyə çağırırlar.-05D-