Azərbaycanda Cəzasızlığa qarşı Beynəlxalq Gün qeyd ediləcək

Reportyorların Azadlıq və Təhlükəsizlik İnstitutu (RATİ) noyabrın 23-də publisist Rafiq Tağının qəbrini ziyarət etməklə və “Cəzasızlığa son qoymağın vaxtı çatmışdır” adlı dəyirmi masa keçirməklə Cəzasızlığa qarşı Beynəlxalq Günü qeyd etmək niyyətindədir. 

Cəzasızlığa qarşı Beynəlxalq Gün 2011-ci ildən etibarən İFEX – ifadə azadlığı hüququnu müdafiə edən qlobal təşkilatlar şəbəkəsinin təşəbbüsü ilə qeyd edilir.

Bu gün 2009-cu ildə Filippinin Ampatuan şəhərində 32 jurnalist və KİV işçisinin qətlə yetirilməsindən sonra qeyd edilməyə başlayıb. Aksiyanın məqsədi ifadə azadlığına görə təqib edilənlər üçün ədalətli mühakiməyə nail olmaqdır.

RATİ mətbuat azadlığı uğrunda mübarizə aparan hər kəsi Azərbaycan hakimiyyətinə qarşı irəli sürüləcək aşağıdakı tələblərə qoşulmağa çağırır:

- Jurnalistləri qətlə yetirən və onlara fiziki təzyiq göstərən şəxslərə qarşı cəzasızlığın bütün formalarına son qoyulsun, jurnalistlərə qarşı törədilmiş bütün cinayət əməllərinin üstünün açılması və cavabdehlərin qanuna uyğun olaraq cəzalandırılması təmin edilsin

- 2005-ci ilin martında qətlə yetirilmiş Elmar Hüseynovun və 2011-ci ilin noyabrında qətlə yetirilmiş Rafiq Tağının qətllərinin sifarişçiləri və icraçıları həbs olunsun və məhkəmə qarşısına çıxarılsın

-  E.Hüseynov və R.Tağının qətlləri ilə bağlı dolğun məlumat ictimaiyyətə çatdırılsın

- 2012-ci ilin martında tənqidçi jurnalist Xədicə İsmayılovaya qarşı hədə-qorxu və şantaj təxribatını həyata keçirən şəxslər hədə-qorxu etməyə və şəxsi həyata müdaxiləyə görə həbs edilsin və məsuliyyətə cəlb olunsun

- Jurnalistlərin hədə-qorxuya məruz qalması halları tam araşdırılsın və onların etibarlı müdafiəsi mexanizmi yaradılsın.

Noyabrın 23-də saat 12.00-13.00-da RATİ-də bu mövzularda dəyirmi masa keçiriləcək, 14.00-da Rafiq Tağının məzarı ziyarət olunacaq. -06D-