Azərbaycanda məzar daşları haqda mühazirə

Ötən şənbə günü  Azərbaycan Milli İncəsənət Muzeyində Azərbaycan Milli Elmlər Akademiyası Arxeologiya və Antropologiya İnstitutunun tədqiqatçıları Rüstəm Hüseynov və Mehdi Əli “Azərbaycan məzar daşlarının bədii xüsusiyyətləri. Ənənə və müasirlik” mövzusunda mühazirə keçiriblər.

Mühazirədə dinləyicilərə məzar daşlarının bədii tərtibatı və epiqrafiyasının xüsusiyyətləri göstərilib, klassik ənənənin yaranma prosesi, XX-ci əsrin 70-ci illərində onun dağıdılması və deqradasiya prosesi açıqlanıb.

Azərbaycan ərazisindəki runik abidələr, onların xüsusiyyətləri, yerləşdiyi yer, mövcud vəziyyət, hüquqi statusu və sonrakı dövrlərin bədii üslubuna təsirinə xüsusi diqqət yetirilib.

Dəfn abidələrindəki rünlər və islam dövrünün məzar daşlarında bütpərəstlik simvollarının olması, üslubların qarışdırılması faktları, eyni zamanda müxtəlif növlərin mövcudluğu auditoriyanın xüsusi marağına səbəb olub.

Tədbirdə məqsəd diqqəti müasir antropoloji tədqiqatlara cəlb etmək, Azərbaycanın tarix və mədəniyyətinin az məlum olan detallarının öyrənilməsinə maraq oyatmaqdır.